شىمكەنتتە تانىستارى مەن تۋىستارىن الداپ، 340 ملن تەڭگە جىمقىرعان قىلمىستىق توپتىڭ مۇشەلەرى سوتتالدى. 

پوليسيا قىزمەتكەرلەرىنىڭ مالىمەتىنشە، قالالىق پوليسيا بولىمشەسىنە جالعان تەندەرمەن اينالىساتىن الاياقتاردىڭ قۇربانى بولعانىن ايتىپ، 235 ادام شاعىم تۇسىرگەن.

جابىرلەنۋشىلەردىڭ ايتۋىنشا، ءوز تانىستارى تەندەرمەن اينالىساتىن باستىعىنا كومەك قاجەتتىگىن العا تارتىپ، نەسيە راسىمدەۋگە ۇگىتتەگەن. جاساعان جاقسىلىعى ءۇشىن تيەسىلى ۇلەسىن بەرۋگە جانە بانك الدىنداعى قارىزدى تولىق وتەۋگە ۋادە ەتكەن. كوبىنەسە ولار نەسيەنى تاۋارلاي راسىمدەتىپ، الىنعان قىمبات تەحنيكانى قايتا ساتىپ، شىققان سومانىڭ 10-12 پايىزىن سىياقى رەتىندە بەرىپ وتىرعان. الايدا اي سايىنعى تولەم ۋاقىتى كەلگەندە، كۇدىكتىلەر قوڭىراۋعا جاۋاپ بەرمەي، ىزدەرىن سۋىتقان. سالدارىنان نەسيە ءوسىمى كوبەيىپ، ازاماتتار قارىزعا بەلشەسىنەن باتقان.

11 ادامنان تۇراتىن قىلمىستىق توپتىڭ قۇرباندارى تۇركىستان وبلىسىنىڭ جانە شىمكەنت قالاسىنىڭ تۇرعىندارى بولىپ شىقتى. اتالعان جايتتى تەرگەۋشىلەر ق ر قك-نىڭ 190 بابى بويىنشا ءىس قوزعادى. 

قىلمىستىق توپ 23-43 جاس ارالىعىنداعى 4 ايەل جانە 7 ەر ادامنان تۇرعان. ونىڭ ىشىندە ەكى بانك مەنەدجەرى بار. ولاردىڭ ءارقايسىسىنىڭ ءوز مىندەتتەرى بولعان: كەيبىرى نەسيە الاتىن ادامداردى تابۋمەن، ەكەۋى ونى راسىمدەۋمەن، قالعاندارى ساتىپ الىنعان تاۋارلاردى الىپ-ساتۋمەن اينالىسقان. كەلتىرىلگەن جالپى شىعىن كولەمى – 340 ملن تەڭگەگە جۋىق. ارىزدانۋشىلار ءارتۇرلى بانكتەردەن 250 مىڭ تەڭگەدەن 6 ملن تەڭگەگە دەيىن قارىز العان.

ءتارتىپ ساقشىلارى جيناقتالعان ءىس-قۇجاتتاردى ايىپتاۋ اكتىسىمەن سوتقا جولدادى. ايىپتالۋشىلاردىڭ ءارقايسىسى جاساعان قىلمىسى ءۇشىن 5 جىلعا دەيىن سوتتالدى.