پاۆلوداردا جاستار ءۇيىنىڭ كامەلەتكە تولماعان تاربيەلەنۋشىسىن زورلاۋ ءىسى بويىنشا سوت پروسەسى اياقتالدى، - دەپ حابارلايدى Qamshy.kz اقپارات اگەنتتىگى Tengrinews.kz-كە سىلتەمە جاساپ.

2022 جىلى 16 جاستاعى قىز ءۇش جىگىتتىڭ توپتاسىپ قورلاۋىنان كەيىن 10 قاباتتى ءۇيدىڭ تەرەزەسىنەن سەكىرىپ كەتكەن.

ايىپتالۋشى تاراپتا ءۇش ادام بولعان، ولاردىڭ بىرەۋى 19 جاستا. پاۆلودار وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتى ونى ق ر قك-نىڭ 120-بابى 3-1-بولىگى "كامەلەتكە تولماعاندى ​​زورلاۋ"، 121-بابى 3-1-بولىگى "كامەلەتكە تولماعانعا قاتىستى جىنىستىق سيپاتتاعى زورلىق-زومبىلىق ارەكەتتەرى" بويىنشا كىنالى دەپ تانىپ، وعان 15 جىل 6 ايعا باس بوستاندىعىنان ايىرۋ تۋرالى ۇكىم شىعارعان. سونداي-اق، سوت ونى جابىرلەنۋشىگە مورالدىق شىعىن رەتىندە 8 ميلليون تەڭگە تولەۋگە مىندەتتەدى.

وسى ءىس بويىنشا تاعى ەكى ايىپتالۋشىنى سوت ق ر قىلمىستىق كودەكسىنىڭ 434-بابى "قىلمىس تۋرالى حابارلاماۋ" بويىنشا ءتورت جىلعا باس بوستاندىعىنان ايىرعان.

"وقيعادان كەيىن، قىز سەكىرىپ كەتكەن سوڭ، ولار جەدەل جاردەم شاقىرماعان. ءبىراق وقيعاعا كۋا بولعانى. ەشتەڭە بولماعانداي تاراپ كەتتى"، - دەيدى پاۆلودار وبلىسىنىڭ مامانداندىرىلعان اۋدانارالىق قىلمىستىق ىستەر باسقارماسىنىڭ سۋدياسى باقىت نۇرلانوۆ.

سوتتالعاندار جازاسىن ورتاشا قاۋىپسىزدىكتەگى تۇزەۋ مەكەمەسىندە وتەيتىن بولادى. پروسەسس جابىق ەسىك جاعدايىندا ءوتتى. سوتتالۋشىلاردى ادۆوكاتتاردان بولەك اتا-انالارى مەن جاقىن تۋىستارى قورعادى.

باستاپقىدا قىزدى توپتاسىپ زورلاعانى حابارلانعان. ءبىراق كەيىن ونى ءۇش جىگىتتىڭ ءبىرى زورلاعانى بەلگىلى بولدى. توپتىق قورلاۋدان قورىققان ول كوپقاباتتى ءۇيدىڭ تەرەزەسىنەن سەكىرىپ كەتكەن.

قىز اعاشتارعا قۇلاپ، امان قالعان. ءبىر جىلدان اسا استانا مەن پاۆلودارداعى اۋرۋحانالاردا جاتىپ، بىرنەشە وتا جاسالعان.

ەسكە سالايىق، بىلتىر جازدا ءۇش جىگىت 16 جاستاعى قىزدى وتىرىك ايتىپ، پاتەرگە كىرگىزىپ، كەيىن زورلاعانى تۋرالى اقپارات شىققان بولاتىن.