ءماجىلىس ءتوراعاسى ەرلان قوشانوۆ مەملەكەت باسشىسىنىڭ تاپسىرماسىمەن ءماشھۇر ءجۇسىپ كوپەيەۆتىڭ 165-جىلدىق مەرەيتويىنا ارنالعان سالتاناتتى ءىس-شاراعا قاتىستى.

القالى جيىن پاۆلودار وبلىسى باياناۋىل اۋدانىندا ءوتتى.

ءماجىلىس سپيكەرى پرەزيدەنت قاسىم-جومارت توقايەۆتىڭ قۇتتىقتاۋ حاتىن وقىپ بەردى.

– ءماشھۇر ءجۇسىپ كوپەي ۇلى حالقىمىزدىڭ اۋىز ادەبيەتىن، شەجىرەلى تاريحىن جانە ءسالت-داستۇرىن جان-جاقتى زەردەلەپ، ۇلت رۋحانياتىن دامىتۋعا ولشەۋسىز ۇلەس قوستى. حالىقتى ونەر-بىلىمگە شاقىرعان ولەڭدەر مەن تولعاۋلار، داستاندار مەن قيسسالار جازىپ، ءتول ادەبيەتىمىزدىڭ كوكجيەگىن كەڭەيتتى. ۇلى ويشىلدىڭ مول مۇراسى ءالى دە تالاي ۇرپاقتىڭ قاجەتىنە جارارى ءسوزسىز. «سالعان مەنى بەينەتكە ءعىلىم-بىلىم» دەپ اقىننىڭ ءوزى جىرلاعانداي، تەرەڭ تانىم مەن تەلەگەي ءبىلىمنىڭ ارقاسىندا ەلگە تانىمال بولىپ، «ءماشھۇر» اتانعان ابىزدى ۇلىقتاپ، ەڭبەكتەرىن جۇرتتىڭ جادىندا جاڭعىرتۋ – بارشامىزدىڭ ورتاق پارىزىمىز، – دەلىنگەن پرەزيدەنت قۇتتىقتاۋىندا.

ەرلان قوشانوۆ ەرتىس-باياناۋىل ولكەسى ۇلتىمىزدىڭ تاعدىرى مەن تاريحىنا وشپەس ءىز قالدىرعان ۇلى پەرزەنتتەردى دۇنيەگە اكەلگەن كيەلى توپىراق ەكەنىن اتاپ ءوتتى. سولاردىڭ ءبىرى دە، بىرەگەيءى – ءماشھۇر ءجۇسىپ كوپەي ۇلى.

ءماجىلىس ءتوراعاسى اقىن ولەڭدەرى مەن كوسەمسوزى قازاق رۋحانياتىنىڭ التىن قورىنان ويىپ تۇرىپ ورىن الاتىنىنايتتى.

– ول كەزدە زامان قانداي بولعانىن بىلەمىز. سول الاساپىران ۋاقىتتىڭ وزىندە قانشاما شەجىرەنى، داستان-قيسسالاردى، ەرتەگىلەردى، ايتىس ۇلگىلەرىن كوزىنىڭ مايىن تامىزىپ وتىرىپ جيناعانى ەرلىككە پارا-پار، – دەدى ءماجىلىس ءتوراعاسى.

ءسوز سوڭىندا ءماجىلىس سپيكەرى ەرلان قوشانوۆ ءماشھۇر ءجۇسىپ كوپەي ۇلىنىڭ ەسىمى مەن مول مۇراسى حالقىمىزبەن بىرگە ماڭگى جاساي بەرەتىنىن ەرەكشە اتاپ ءوتتى.

مەرەيتوي اياسىندا وبلىستا رەسپۋبليكالىق اقىندار ايتىسى، جىرشى-تەرمەشىلەر بايقاۋى، كوكپار، بايگە مەن قازاق كۇرەسىنەن جارىس ءوتتى.

ءماجىلىستىڭ باسپا ءسوز قىزمەتى