باس پروكۋراتۋرا تالدىقورعاندىق جۋرناليست ساندۋعاش دۇيسەنوۆاعا قاتىستى قىلمىستىق ءىستىڭ توقتاتىلعانىن حابارلادى.

12 تامىزدا ساندۋعاش دۇيسەنوۆانىڭ ۇستىنەن قىلمىستىق ءىس قوزعالعانى مالىمدەنگەن بولاتىن.

14 تامىزدا دۇيسەنوۆا جەتىسۋ وبلىسىنىڭ پروكۋرورى ماديار باسشىبايەۆپەن قىلمىستىق جاۋاپكەرشىلىككە تارتۋ ماسەلەسى بويىنشا جەكە قابىلداندى. ونىڭ دالەلدەرىن ەسكەرىپ، پروكۋراتۋرا زەرتتەۋ ءۇشىن قىلمىستىق ءىستى سۇراتىپ الدى. قىلمىستىق كودەكستىڭ 147-بابى 5-بولىگىنە سايكەس، باق-تا دەربەس دەرەكتەردى زاڭسىز تاراتۋ سالدارىنان ادامنىڭ قۇقىعى مەن مۇددەسىنە ەلەۋلى زيان كەلسە، ادام قىلمىستىقتىق جاۋاپكەرشىلىككە تارتىلادى.

الايدا تەرگەۋ بارىسىندا جابىرلەنۋشىگە ەلەۋلى زيان كەلتىرىلگەنىن راستايتىن جەتكىلىكتى ناقتى دەرەكتەر انىقتالعان جوق. وسىعان بايلانىستى تالدىقورعان قالاسى پروكۋرورىنىڭ قاۋلىسىمەن سوتقا دەيىنگى تەرگەۋ ىس-ارەكەتتە قىلمىستىق قۇقىقبۇزۋشىلىق قۇرامىنىڭ بولماۋىنا بايلانىستى توقتاتىلدى، - دەپ جازىلعان حابارلامادا.

ارەكەت قىلمىستىق جاۋاپقا اكەپ سوقپاسا، وندا اكىمشىلىك قۇقىقبۇزۋشىلىق تۋرالى كودەكستە دەربەس دەرەكتەردى زاڭسىز جيناۋ جانە وڭدەۋ ءۇشىن اكىمشىلىك جاۋاپكەرشىلىك كوزدەلگەن.

سوندىقتان ماتەريالدار اكىمشىلىك قۇقىقبۇزۋشىلىق تۋرالى زاڭناماعا سايكەس، ولاردى قاراۋ ءۇشىن اقپاراتتىق قاۋىپسىزدىكتى قامتاماسىز ەتۋ سالاسىنداعى ۋاكىلەتتى ورگانعا جولداندى.