ەكولوگيالىق زاڭ بۇزۋشىلىقتارعا جول بەرگەنى ءۇشىن "تەڭىزشيەۆرويل" كومپانياسىنا 2،8 ملرد تەڭگە ايىپپۇل سالىندى. بۇل تۋرالى اتىراۋ وبلىسىنىڭ ەكولوگيا دەپارتامەنتى حابارلادى.
2023 جىلى اتىراۋ وبلىسىنىڭ مامانداندىرىلعان تابيعات قورعاۋ پروكۋراتۋراسى "تەڭىزشيەۆرويل" ج ش س قورشاعان ورتاعا ەكولوگيالىق ەميسسيالاردى رۇقساتسىز شىعارعانىن، رۇقسات ەتىلگەن نورماتيۆتەردەن اسىرىپ جىبەرگەنىن جانە جەردى بۇلدىرگەنىن انىقتاپ، زاڭ بۇزۋشىلىققا جول بەرگەن تۇلعانى اكىمشىلىك جاۋاپكەرشىلىككە تارتۋدى ۇسىندى، - دەپ جازىلعان حابارلامادا.
سول سەبەپتى اتىراۋ وبلىسى بويىنشا ەكولوگيا دەپارتامەنتى "تەڭىزشيەۆرويل" جشس-نە قاتىستى اكىمشىلىك قۇقىقبۇزۋشىلىق تۋرالى كودەكستىڭ 328 جانە 337-باپتارى بويىنشا اكىمشىلىك قۇقىقبۇزۋشىلىق تۋرالى حاتتامالار جاساپ، قاراۋ ءۇشىن جىلىوي اۋداندىق سوتىنا جولدادى.
جىلىوي اۋداندىق سوتىندا جوعارىدا اتالعان ىستەر بىرىكتىرىلە قارالىپ، سوت ناتيجەسىندە "تەڭىزشيەۆرويل" جشس-نە جالپى سوماسى 2،8 ملرد تەڭگە كولەمىندە اكىمشىلىك ايىپپۇل سالىندى.
