ۇەم حابارلاعانداي، كاسىپورىن استانادا تىركەلگەن. بۇگىندە ونىڭ قىزمەتى بەلسەندى ەمەس.
قارجى مينيسترلىگىنىڭ اقپاراتى بويىنشا، كومپانيانىڭ قىزمەتى 2021 جىلعى 14 اقپاننان باستاپ توقتاتىلعان. ال يندۋستريا جانە ينفراقۇرىلىمدىق دامۋ مينيسترلىگىنىڭ مالىمەتىنە سۇيەنسەك، كاسىپورىنعا ەرەكشە تاۋارلاردى وتكىزۋگە ليسەنزيا، رۇقسات بەرىلمەگەن.
"ءبىز كومپانيانىڭ سانكسيالار تىزىمىنە ەنگىزىلۋىن ونىڭ يەسى اشوت مكرتىچيەۆتىڭ اقش سانكسياسىندا بولۋىمەن بايلانىستىرامىز. ايتا كەتەرى، مكرتىچيەۆ قازاقستان رەزيدەنتى ەمەس. كومپانيانىڭ سانكسيالار تىزىمىنە ەنگىزىلۋى تەحنيكالىق سيپاتتاعى ءجايت"، - دەلىنگەن ۇلتتىق ەكونوميكا مينيسترلىگىنىڭ مالىمدەمەسىندە.
ۆەدومستۆو اقپاراتىنشا، بۇل ادام 2020 جىلعى 7 ناۋرىزدا قازاقستان اۋماعىنان كەتىپ قالعان. ودان كەيىن ەلگە كىرمەگەن.
مينيسترلىك مكرتىچيەۆتىڭ باسقا يۋريسديكسيالاردا تىركەلگەن تاعى ەكى كومپانياسى سانكسياعا ىلىككەنىن اتاپ ءوتتى.
"ءبىز باتىستاعى ارىپتەستەرىمىزبەن ۇنەمى بايلانىستامىز. بۇل كومپانيا بويىنشا ءتيىستى شارالار قابىلدانادى"، - دەپ سەندىردى مينيسترلىكتەگىلەر.
بۇعان دەيىن اقش "سولتۇستىك كورەيامەن بايلانىسى ءۇشىن" قازاقستان، رەسەي جانە سلوۆاكياداعى ءۇش كومپانياعا قاتىستى سانكسيا ەنگىزگەنى حابارلانعان بولاتىن. امەريكالىق قارجى مينيسترلىگىنىڭ مالىمەتىنشە، ءۇش فيرمانىڭ دا سلوۆاكيا ازاماتى اشوت مكرتىچيەۆكە قاتىسى بار.
