رەسەيدىڭ ىشكى ىستەر مينيسترلىگىنىڭ قورعان وبلىسى بويىنشا قورعان قالاسىنىڭ قىزمەتكەرلەرى حالىقارالىق ىزدەۋدە جۇرگەن 31 جاستاعى قازاقستان رەسپۋبليكاسىنىڭ ازاماتىن ۇستادى، – دەپ حابارلايدى Polisia.kz.

ەر ادام قازاقستان رەسپۋبليكاسى قىلمىستىق كودەكسىنىڭ 190-بابىنىڭ 4-بولىگى (الاياقتىق) بويىنشا قىلمىس جاسادى دەپ ايىپتالۋدا. انىقتالعانداي، قاسكۇنەم 2018 جىلى استانا قالاسىندا ءبىر توپ ازاماتتارمەن بىرلەسىپ، الدىن الا جەتكىزۋشى رەتىندە تەندەرلەرگە قاتىسۋشى بولىپ، تۇلعالاردىڭ سەنىمىنە كىرگەن.

كەيىن ءتيىستى ونىمدەردى جەتكىزۋشى رەتىندە كەلىسكەن شارتتى بۇزىپ، اتالعان ونىمدەردى زاڭسىز يەمدەنىپ العانى انىقتالعان. الاياقتار الداۋ ارەكەتتەرىمەن 39 ميلليون تەڭگەدەن استام ماتەريالدىق شىعىن كەلتىرگەن.

ونىڭ سىبايلاستارى بۇرىن قاماۋعا الىنعان بولاتىن. اتالعان فاكتى بويىنشا قاماۋعا الۋ بۇلتارتپاۋ شاراسىمەن قىلمىستىق ءىس قوزعالدى.

قازىرگى ۋاقىتتا مينسك كونۆەنسياسىنا سايكەس، بۇل ازاماتتى ەكستراديسيالاۋ ماسەلەسى شەشىلىپ جاتىر.