تۇركىستان وبلىسىنىڭ اكىمدىگى سىرداريا وزەنىنە باتىپ كەتكەن ادامداردىڭ وتباسىلارىنا بارلىق قاجەتتى كومەك كورسەتىلەتىنىن حابارلادى. سونداي-اق قايعىلى وقيعانىن ءمان-جايىن ءتۇسىندىردى.
قايعىلى جاعداي 21 تامىزدا كەشكى ساعات 18:00ء-دىڭ كەزىندە وتىرار اۋدانىنداعى سىرداريا وزەنىنەن وتەتىن كوپىر ماڭىندا بولعان. شومىلۋعا بارعان 20 ادامنىڭ 11ء-ى سۋعا باتىپ كەتكەن. ونىڭ 5-ەۋى بالالار بولسا، 6-اۋى – ەرەسەكتەر. بارلىعى سىرداريا وزەنىندەگى اۆتوكولىك كوپىرىنىڭ ماڭىندا تىيىم سالىنعان جەردە شومىلعان.
سوڭعى اقپاراتقا سايكەس، سۋعا كەتكەن 11 ادامنىڭ سەگىزىنىڭ دەنەسى تابىلدى. ىزدەستىرىلىپ جاتقان ءۇش ادامنىڭ ەكەۋى – جاسوسپىرىمدەر. سۋعا باتىپ كەتكەندەردىڭ بارلىعى – كوكساراي اۋىلىندا تۇراتىن ءبىر اۋلەتتىڭ ادامدارى.
جەرگىلىكتى تۇرعىنداردىڭ ايتۋىنشا، قايعىلى جاعداي بولعان جەردە سۋدىڭ اعىسى قاتتى. ال جاعادا ساز بەن بالشىق كوپ. قايتىس بولعان ادامدار سۋعا ءتۇسىپ تە ۇلگەرمەگەن. بىرەۋى تايىپ سۋعا قۇلاعان، ونى باسقالار قۇتقارامىن دەگەندە بىرىنەن سوڭ ءبىرى باتىپ كەتكەن.
"قۇتقارۋشىلار مەن ەرىكتىلەر تۇرعىندارعا جاز بويى بۇل جەرگە تۇسۋگە بولمايتىنى تۋرالى جان-جاقتى ەسكەرتۋ جۇمىستارىن جۇرگىزگەن. انىقتالعانداي، مۇنداي ءتۇسىندىرۋ جۇمىستارىنا ءدال وسى اۋلەت تە قاتىسقان. الايدا رۇقسات ەتىلمەگەن ورىندا شومىلۋدىڭ زاردابى مەن ساقتىق شارالارىن ەسكەرمەۋدىڭ سالدارى وسىنداي جاعدايعا ۇلاسىپ وتىر"، - دەيدى اكىمدىك ماماندارى.
قازىرگى كەزدە وقيعا ورنىندا جۇزدەگەن قۇتقارۋشى ءجۇر. اكىمدىكتىڭ جانىنان ارنايى شتاب قۇرىلدى. جەدەل جەلىنىڭ تەلەفونى: 8-7253-357881.
پىكىر قالدىرۋ