تالدىقورعان قالاسىنداعى تەرگەۋ اباقتىسىندا وتىرعان جۋرناليست دۋمان مۇحامەدكارىمنىڭ جاعدايى تۋرالى ادۆوكاتى مالىمدەمە جاسادى. ادۆوكات جالعاس ساپارحانوۆتىڭ ايتۋىنشا، قاماۋداعى جۋرناليست ساۋساعىن شاۋىپ، قايتا اشتىق جاريالاماق بولعان. 

دۋمان مۇحامەدكارىم بۇعان دەيىن ءوزىن الماتى قالاسىنداعى №72 مەكەمەسىنە اۋىستىرۋ تۋرالى تالاپ قويعان بولاتىن. ءالى كۇنگە دەيىن ءجۋرناليستىڭ تالابى ورىندالمادى.

"اتا-اناسى زەينەتكەر جاستا بولعاندىقتان، ولاردىڭ كەلىپ-كەتۋىن الاڭدايدى، ۋايىمدايدى. وسى تالابى ورىندالماي جاتقاندىقتان، 19.08.2023 جىلى كۇندىز ساعات 15:00 شاماسىندا سول قولىنداعى بەسىنشى، كىشى ساۋساعىن شاپپاق بولعان، قاپاستا ەشبىر تەمىر زات بولماعاندىقتان، پلاستيكالىق زاتتى الىپ ساۋساعىن شاپپاق بولعاندا پلاستيكالىق زات سىنىپ كەتكەن، ناتيجەسىندە ساۋساعى جىرىلىپ، كوگەرىپ، ءىسىپ كەتكەن. كورىپ، ۋايىمداپ قالدىم، تالابىم ورىندالمايىنشا ساۋساعىمدى ءبىر كۇنى شابامىن دەپ وتىر"، دەپ جازدى ادۆوكات. 

دۋمان مۇحامەدكارىم بۇگىننەن باستاپ تالابى ورىندالمايتىن بولسا 1 قىركۇيەكتەن باستاپ اشتىق جاريالاپ، ساۋساعىن شاباتىنىن ايتقان.