بۇگىن پارلامەنت ءماجىلىسىنىڭ سپيكەرى، «اماNات» ءتوراعاسى ەرلان قوشانوۆ پارتيانىڭ رەسپۋبليكالىق قوعامدىق قابىلداۋ بولمەسىندە ازاماتتاردى جەكە قابىلدادى.

ەلىمىزدىڭ ءار ءوڭىرىنىڭ تۇرعىندارى ينفراقۇرىلىمدى دامىتۋعا، تازا اۋىز سۋمەن قامتاماسىز ەتۋگە، ەرەكشە قاجەتتىلىكتەرى بار ادامداردى قولداۋعا قاتىستى جانە باسقا دا ماسەلەلەرمەن «AMANAT» پارتياسىنا جۇگىندى.

ماسەلەن، شىعىس قازاقستان وبلىسىنداعى التاي قالاسىنىڭ 40 مىڭ تۇرعىنى اتىنان حابارلاسقان ءبىر توپ ازامات وسينوۆ اسۋىن اينالىپ وتەتىن جاڭا جول سالۋ ماسەلەسىن كوتەردى. وندا جىل سايىن مىڭداعان تۋريست كەلەدى.

 «التاي جانە شەكارا ماڭىنداعى كاتونقاراعاي اۋداندارىنىڭ تۇرعىندارى ءۇشىن بۇل جولدىڭ ماڭىزى زور. مۇنداعى قۇرىلىس 2018 جىلى باستالعان ەدى، ءبىراق كەيىن تولىعىمەن توقتاپ قالدى. مەملەكەتتىك ورمان قورىنان جەر تەلىمدەرىن بەرۋ جۇمىستارى كەشىكتىرىلۋىنە بايلانىستى جولدى جوندەۋگە قاجەت ماتەريالدار قىمباتتاپ كەتتى. سىزدەن جولدى جوندەۋ جۇمىستارىن تەزدەتۋگە كومەك كورسەتۋىڭىزدى سۇرايمىز»، – دەلىنگەن ازاماتتاردىڭ ۇجىمدىق ۇندەۋىندە.

ەرلان قوشانوۆ پارتيا فيليالىنا يندۋستريا جانە ينفراقۇرىلىمدىق دامۋ مينيسترلىگىمەن جانە شىعىس قازاقستان وبلىسىنىڭ اكىمدىگىمەن بىرلەسە وتىرىپ، جول قۇرىلىسىنا قاجەتتى بارلىق جەر تەلىمىن بەرۋ ماسەلەسىن تەز ارادا شەشۋدى تاپسىردى. سونداي-اق قاجەتتى قاراجاتتى ءبولۋدى جەدەلدەتۋ كەرەك ەكەنىن ايتتى.

«مەملەكەت باسشىسى قاسىم-جومارت توقايەۆ شەكارا ماڭىنداعى وڭىرلەردى دامىتۋعا ەرەكشە نازار اۋدارىپ، ىشكى ءتۋريزمدى دامىتۋعا بارلىق جاعداي جاساۋدى تاپسىردى. بۇل ورايدا اتالعان  ماسەلەلەر وسى جولدى جوندەۋگە تىكەلەي قاتىستى بولىپ وتىر. مۇنداعى جۇمىس باستالىپ تا كەتكەن. سوندىقتان بۇل ماسەلەنى قىسقا مەرزىمدە شەشۋ كەرەك»، – دەدى پارتيا ءتوراعاسى.

ال اقتاۋ قالاسىنىڭ تۇرعىنى ايسۇلۋ قۇرمانعازييەۆا مەن كۇيەۋى جالعاس كۋۆاتوۆ كاسىپكەرلىكپەن اينالىسىپ، ساۋدا پاۆيلونىن اشۋدى جوسپارلاپ وتىر. ەكەۋى دە ەكىنشى توپتاعى مۇگەدەك.

«بىزگە جۇمىسىمىزدى باستاۋ ءۇشىن رۇقسات الۋعا جاردەمدەسۋىڭىزدى جانە ماتەريالدىق تۇرعىدا كومەك كورسەتۋىڭىزدى سۇرايمىز»، – دەدى ايسۇلۋ قۇرمانعازييەۆا.

ەرلان قوشانوۆ پارتيانىڭ وڭىرلىك فيليالىنا ءوتىنىش بەرۋشىلەرگە بارىنشا كومەك كورسەتۋدى تاپسىردى. ول ەرەكشە قاجەتتىلىكتەرى بار ادامداردى جان-جاقتى قولداۋ – «AMANAT» پارتياسىنىڭ باسىمدىقتارىنىڭ ءبىرى ەكەنىن اتاپ ءوتتى.

اقمولا وبلىسى شورتاندى كەنتىنىڭ 8 مىڭنان استام تۇرعىنى اۋىز سۋ تاپشىلىعىن وتكىر سەزىنىپ وتىر. ماسەلەنىڭ شەشىمىن ىزدەگەن سەرىكبول مەرەي پارتيا توراعاسىمەن كەزدەسۋگە كەلدى.

«قولدانىستاعى جەتى ۇڭعىمانىڭ تەك تورتەۋى عانا جۇمىس ىستەپ تۇر، قالعاندارىندا سۋ قورى تاۋسىلعان. اسىرەسە، جاز مەزگىلىندە ەگىستىكتەردى سۋارۋعا جانە تەحنيكالىق قاجەتتىلىكتەرگە كوپ مولشەردە پايدالانىلعاندىقتان سۋ تاپشىلىعى ايتارلىقتاي سەزىلەدى»، – دەدى ول.

ەرلان قوشانوۆ بۇل ماسەلەنى شەشۋ ءۇشىن قازىرگى ۋاقىتتا توپتىق سۋ قۇبىرىن تارتۋ جوباسى ازىرلەنگەنىن ايتتى. جۇمىس كولەمى مەن ونى ورىنداۋشىلار بەلگىلى بولدى. «AMANAT» پارتياسىنىڭ ماجىلىستەگى فراكسياسى سۋ قۇبىرى جەلىلەرىن قايتا جوندەۋگە رەسپۋبليكالىق بيۋدجەتتەن جاقىن ارادا ءتيىستى قاراجات ءبولۋدى ءوز باقىلاۋىنا الادى.

ال ەلوردا تۇرعىنى، 11 بالانىڭ اناسى نۇرگۇل قادىربايەۆا ەكى ۇلى ارمان مەن اناس فۋتبولدان قازاقستان مەن تمد ەلدەرىندە وتكەن چەمپيوناتتاردا جوعارى شەبەرلىك كورسەتكەنىن اتاپ ءوتتى. ءسويتىپ، ولار پورتۋگالياداعى Bsports جاستار كلۋبىنا ونەر كورسەتۋگە شاقىرتۋ العان. ءبىراق قارجىلىق جاعدايدىڭ قيىندىعىنا بايلانىستى بارا الا الماي وتىر.

«AMANAT» پارتياسىنىڭ ءتوراعاسى باتىر اناعا جاس فۋتبولشىلار ءۇشىن قاجەتتى كومەك كورسەتىلەتىنىن ايتتى. بۇل ماسەلەگە ەلوردا اكىمدىگى مەن مادەنيەت جانە سپورت مينيسترلىگى دە اتسالىساتىن بولادى.

ەرلان قوشانوۆ بارلىق قارالعان ءوتىنىش بويىنشا پارتيا فيليالدارىنا ناقتى تاپسىرمالار بەرىپ، ولاردىڭ شەشىلۋىن جەكە باقىلاۋىنا الدى.