سەمەيدە قاڭتار وقيعاسى كەزىندە جاندوس جوتابايەۆتى ازاپتاعان 2 پوليسيا قىزمەتكەرى شارتتى تۇردە سوتتالدى.
ءىس بويىنشا سەمەي سوتى پوليسەيلەر 23 جاستاعى الىشەر قاناقىنوۆ پەن 27 جاستاعى ەرسۇلتان اعزاموۆقا شارتتى ۇكىم شىعاردى.
سوت قاناقىنوۆ پەن اعزاموۆتى "ار-نامىستى قورلايتىن ىس-ارەكەت نەمەسە ازاپتاۋ" بابىمەن كىنالى دەپ تانىپ، 4 جىلعا شارتتى تۇردە سوتتادى. ۇكىم شىعارۋ كەزىندە ايىپتالۋشىلاردىڭ جاسى ەسەپكە الىنعان.
سونداي-اق، سوت ولاردى مورالدىق وتەماقى رەتىندە 4،5 ميلليون تەڭگە تولەۋگە مىندەتتەدى.
ەسكە سالا كەتەيىك، جاندوس جوتابايەۆ بىلتىر 6 قاڭتاردا "بەيبىت ميتينگكە قاتىسقانى ءۇشىن" ۇستالعان. ول پوليسيا بولىمشەسىندە ەكى كۇن قاماۋدا بولىپ، كەيىن ۋاقىتشا قاماۋ يزولياتورىنا اۋىستىرىلعان. 17 قاڭتاردا يزولياتور قىزمەتكەرلەرى جەدەل جاردەم شاقىرىپ، جوتابايەۆتىڭ قايتىس بولعانىن حابارلاعان. جاندوس جوتابايەۆتىڭ باۋىرى 2022 جىلى اقپاندا زەرتتەۋ كەزىندە مارقۇمنىڭ وكپەسىنەن سۇيىقتىق تابىلعانىن، مۇنداي جاعداي قاتتى سوققىعا جىعىلعان ادامدا بولاتىنىن ايتقان. باۋىرىنىڭ ايتۋىنشا، ونىڭ 11 قابىرعاسى سىنعان.
پىكىر قالدىرۋ