كوكشەتاۋداعى 5510 اسكەري بولىمشەنىڭ 40-تان استام اسكەري قىزمەتشىسى جرۆي (جەدەل رەسپيراتورلى ۆيرۋستى ينفەكسيا) بەلگىلەرىمەن جۇقپالى اۋرۋلار ورتالىعىنا جاتقىزىلدى، دەپ حابارلادى قازاقپارات.

ولارمەن بايلانىستا بولعان 5 ادامنان مينينگوكتىق ينفەكسيا، 4 ەنتەروۆيرۋستىق ينفەكسيا انىقتالدى. بۇل تۋرالى اقمولا وبلىستىق سانيتاريالىق – ەپيدەميولوگيالىق باقىلاۋ دەپارتامەنتى باسشىسىنىڭ ورىنباسارى سەرىك ومارحانوۆ ءمالىم ەتتى.

دەپارتامەنت باسشىسى ورىنباسارىنىڭ ايتۋىنشا، قازىرگى كەزدە ناۋقاستاردى جانە ولارمەن بايلانىستا بولعان ادامداردى لاباروتوريالىق زەرتتەۋ شارالارى جالعاسۋدا.

«بيىلعى جىلدىڭ 23 تامىزىندا اقمولا وبلىستىق سانيتاريالىق – ەپيدەميولوگيالىق باقىلاۋ دەپارتامەنتىنە اقمولا وبلىستىق دەنساۋلىق ساقتاۋ باسقارماسىنان كوكشەتاۋ قالالىق كوپبەيىندى اۋرۋحاناسىنا وبلىس ورتالىعى اۋماعىندا ورنالاسقان 5510 اسكەري بولىمشەسىنەن ساربازداردىڭ جرۆي (جەدەل رەسپيراتورلى ۆيرۋستى ينفەكسيا) بەلگىلەرىمەن اسكەري قىزمەتشىلەردىڭ جەتكىزىلگەندىگى تۋرالى اقپارات ءتۇستى. بۇگىنگى تاڭدا جۇقپالى اۋرۋلارى ورتالىعىنا 40-تان استام اسكەري قىزمەتشى جاتقىزىلدى، ولاردىڭ جاعدايى ورتاشا، كەيبىرىنىڭ جاعدايى قاناعاتتارلىق. بىرلەسىپ جۇرگىزىلىگەن ەپيدەمياعا قارسى شارالاردىڭ ناتيجەسىندە ناۋقاستارمەن بايلانىستا بولعان 278 ادام انىقتالدى، ولاردىڭ بارلىعىندا جرۆي بەلگىلەرى بايقالدى. لاباروتوريالىق زەرتتەۋ بارىسىندا 5 ادامنان مينينگوكتىق ينفەكسيا، 4 ەنتەروۆيرۋستىق ينفەكسيا انىقتالدى. بارلىعىندا كوروناۆيرۋستىق ينفەكسيا تابىلمادى. بايلانىستا بولعان بارلىق 278 ادامنىڭ زەرتتەۋ اناليزدەرى جۇمىس ۇستىندە»، - دەدى اقمولا وبلىستىق سانيتاريالىق – ەپيدەميولوگيالىق باقىلاۋ دەپارتامەنتى باسشىسىنىڭ ورىنباسارى سەرىك ومارحانوۆ.

سونىمەن بىرگە، دەپارتامەنت باسشىسىنىڭ ورىنباسارى اتاپ وتكەندەي، اتالمىش 5510 اسكەري بولىمشە قورعانىس مينيسترلىگىنىڭ قاراماعىندا، ولاردىڭ ءوز سانيتارلىق قىزمەتى بار. سول سەبەپتى، اقمولا وبلىستىق سانيتاريالىق – ەپيدەميولوگيالىق باقىلاۋ دەپارتامەنتى دەرتتىڭ سەبەبىن انىقتاۋعا جانە كەشەندى ەپيدەمياعا قارسى شارالاردى جۇرگىزۋ ءۇشىن پراكتيكالىق كومەك كورسەتپەكشى.

كوكشەتاۋ قالالىق كوپسالالى اۋرۋحاناسى باسشىلىعىنىڭ مالىمەتىنشە، جۇقپالى اۋرۋلار ورتالىعىنا 47 مەرزىمدى اسكەري قىزمەتشى جاتقىزىلعان. ناۋقاستار 23 تامىزدان جەتكىزىلە باستاعان. بەلگىلەرى بىردەي-قالتىراۋ، بەزگەگى ۇستاۋ، قىزۋى كوتەرىلۋ.

«ءبىرىنشى كۇنى بىردەن التاۋى جەتكىزىلدى. بىرەۋى وتە اۋىر جاعدايدا بولدى. تەكسەرۋ كەزىندە جۇرەك توقتاعانعا دەيىن قۇرىسۋلار پايدا بولدى. ابىروي بولعاندا، رەانيماسيالىق شارالار ءساتتى ءوتتى، ءقازىر ناۋقاس جانساقتاۋ بولىمشەسىندە، ەسىن بىلەدى. بۇل سارباز بۇعان دەيىن دە جەلشەشەكپەن اۋىرعان، سول سەبەپتى، دە ونىڭ يممۋنيتەتى تيىسىنشە السىرەگەن. بۇدان كەيىن كۇن سايىن التى جانە ون ادام ءبىزدىڭ جۇقپالى اۋرۋلار ورتالىعىنا بىردەي شاعىمدارمەن كەلە باستادى. ءبىراق ولاردىڭ قىزۋى 38 گرادۋس شاماسىندا تۇراقتى»، دەپ ءتۇسىندىردى مەديسينالىق مەكەمەنىڭ باسشىسى ساكەن قالىمجانوۆ.

دارگەردىڭ ايتۋىنشا، التى سارباز جەكسەنبى كۇنى جەتكىزىلدى، كەشە تاعى ەكەۋى ءتۇستى. جۇقپالى اۋرۋلار ورتالىعىندا اسكەري قىزمەتشىلەرگە تولىق بولىمشە ءبولىندى. ناۋقاستار وقشاۋلانعان ءار پالاتادا ەكى ادامنان.