رەسەيدىڭ بەلگىلى ءپاروديسى، شوۋمەن ماكسيم گالكين قازاقستاندا جوسپارلانعان كونسەرتىنىڭ بولمايتىنىنمالىمدەدى.  بۇل تۋرالى ول ءوزىنىڭ الەۋمەتتىك پاراقشاسىندا جازدى. 

گالكيننىڭ ايتۋىنشا قازاقستانداعى كونسەرتكە بيلىك تاراپىنان تىيىم سالىنىپ وتىر.

"باسىندا كونسەرت بيلەتتەرى جاقسى ساتىلا باستاعان ەدى. سودان كەيىن "بيلەتتەر ساتىلمايدى" دەگەن اڭگىمە شىعا كەلدى. ەندى نەگە ەكەنى بەلگىسىز، كونسەرتكە مۇلدەم تىيىم سالىنىپتى. مەن قازاقستاندى ازات، ەركىن ەل دەپ ويلايتىن ەدىم. قاتەلەسكەن ەكەنمىن" –  دەدى ول.

سونىمەن قاتار، شوۋمەن قازاقستاندىق كورەرمەندەردى جوعارى باعالايتىنىن ايتىپ، الداعى ۋاقىتتا قايتا كەلەتىنىن جازدى. 

ەسكە سالا كەتەيىك، ماكسيم گالكين مەن ونىڭ زايىبى اتاقتى ءانشى اللا پۋگاچيەۆا رەسەي فەدەراسياسىنىڭ باسشىلىعىن ۋكرايناعا باسىپ كىرگەنى ءۇشىن سىناپ، يزرايلگە كوشىپ كەتكەن. 

بىلتىر قىركۇيەك ايىندا رەسەي فەدەراسياسىنىڭ ادىلەت مينيسترلىگى گالكيندى شەتەلدىك اگەنت دەپ تانىعان.