استانا حالىقارالىق اۋەجايىنان "استانا – الماتى" باعىتىندا ۇشىپ بارا جاتقان جولاۋشى تىركەۋ كەزىندە وزىمەن بومبا بار ەكەنىن ايتقان. اۋەجايدا دابىل قاعىلىپ، قىزمەتكەرلەر نىساندى شۇعىل تەكسەرۋگە ءماجبۇر بولدى. 

الايدا استانا حالىقارالىق اۋەجايىنىڭ اۆياسيالىق قاۋىپسىزدىك قىزمەتىندەگىلەر ەشقانداي جارىلعىش زاتتىڭ نىسان اۋماعىندا جوق ەكەنىن انىقتادى.

جارىلعىش زات تۋرالى جالعان حابار بەرگەن جولاۋشى رەيستەن شەتتەتىلىپ، جەلىلىك پوليسيا ءبولىمى قىزمەتكەرلەرىنە تاپسىرىلدى. ءقازىر جولاۋشىعا قاتىستى ق ر قك 273-بابى بويىنشا قىلمىستىق ءىس قوزعالدى.

"جارىلعىش زات تۋرالى جالعان اقپارات بەرگەن جولاۋشى ءوز تۇسىنىكتەمەسىندە "ءبىر قىزدى ۇناتىپ، سوعان ازىلدەۋ ءۇشىن" ايتقانىن جەتكىزدى. الايدا اۆياسيالىق قاۋىپسىزدىك ازىلدەۋگە كەلمەيتىن تاقىرىپ. سوندىقتان جولاۋشىلاردان اۋەجايدىڭ تەكسەرۋ قىزمەتىنە جاۋاپكەرشىلىكپەن قاراپ، جارىلعىش زات تۋرالى جالعان اقپارات تاراتپاۋىن سۇرايمىز"، – دەدى "نۇرسۇلتان نازاربايەۆ حالىقارالىق اۋەجايى" اق PR قىزمەتىنىڭ باسشىسى تويگۇل جۋبانيسوۆا.

ايتا كەتەيىك، جىل باسىنان بەرى استانا حالىقارالىق اۋەجايىندا جارىلعىش زات تۋرالى جالعان اقپارات بەرۋ بويىنشا 30 ءىس تىركەلگەن.