شىعىس قازاقستان وبلىسىنىڭ ەكس-اكىمى دانيال احمەتوۆ استانا اكىمى جەڭىس قاسىمبەكتىڭ جاڭا قىزمەتكە يە بولعانىن حابارلادى.
"بۇگىن استانا جەڭىل اتلەتيكا فەدەراسياسىنىڭ كەزەكتى سايلانبالى كونفەرەنسياسى ءوتتى. كونفەرەنسيا مۇشەلەرىنىڭ شەشىمىمەن جەڭىس ماحمۇد ۇلى قاسىمبەك فەدەراسيا پرەزيدەنتى بولىپ سايلاندى. وتىرىس بارىسىندا قالادا جەڭىل اتلەتيكانى دامىتۋ، باپكەرلەردىڭ بىلىكتىلىگىن ارتتىرۋ جانە سپورتشىلاردىڭ دەڭگەيىن كوتەرۋ سىندى ماڭىزدى ماسەلەلەر تالقىلاندى"، – دەپ جازدى دانيال احمەتوۆ جەلىدەگى پاراقشاسىندا.
ايتا كەتەيىك، 2018 جىلدان بەرى قازاقستان رەسپۋبليكاسى جەڭىل اتلەتيكا فەدەراسياسىن دانيال احمەتوۆ باسقارىپ كەلەدى.
شقو-دا 9 جىل اكىم بولعان احمەتوۆ ماۋسىم ايىندا قىزمەتىنەن بوساتىلعان بولاتىن. ال جەڭىس قاسىمبەك 2022 جىلدىڭ جەلتوقسانىنان بەرى استانا اكىمى قىزمەتىن اتقارادى.
پىكىر قالدىرۋ