قازاقستان ىشكى ىستەر مينيسترلىگىنىڭ قىلمىستىق-اتقارۋ جۇيەسى كوميتەتى اتباسارداعى تۇرمەدە ازاپتالعان بەلسەندى تيمۋر دانەبايەۆتىڭ ءىسى بويىنشا قىزمەتتىك تەرگەۋ باستالعانىن حابارلادى.
"جەلىدە تاراعان ۆيدەودا قاجد اكىمشىلىك مەكەمەسىنىڭ زاڭدى تالابىنا باعىنباۋ فاكتىسىنىڭ جولىن كەسۋدە قىزمەتكەرلەردىڭ قىزمەتتىك جاعدايىن اسىرا پايدالانعانى بايقالادى"، – دەپ حابارلادى كوميتەت.
قازىرگى ۋاقىتتا كولونيا قىزمەتكەرلەرىنە قاتىستى قىزمەتتىك تەكسەرۋ جۇرگىزىلىپ جاتىر. كوميتەت تەكسەرۋ قورىتىندىسى بويىنشا شەشىم شىعاراتىن بولادى.
ەسكە سالا كەتەيىك، تيمۋر دانەبايەۆ – قاڭتار وقيعاسىنان كەيىن "20 مىڭ تەرروريست تۋرالى جالعان اقپارات تاراتتى" دەپ پرەزيدەنت توقايەۆتىڭ ۇستىنەن ارىز جازباق بولعان. ۋكرايناداعى سوعىسقا قارسى پىكىر ايتقان بەلسەندى بىلتىر جەلتوقساندا "ۇلتارالىق ارازدىق قوزدىردى" دەگەن كۇدىكپەن قامالعان ەدى. استانا سوتى 15 ماۋسىمدا بەلسەندىنى ءۇش جىلعا بوستاندىعىنان ايىرعان بولاتىن.
3 قىركۇيەك كۇنى الەۋمەتتىك جەلىدە تۇرمە قىزمەتكەرلەرى اجەتحانا جۋۋدان باس تارتقان تيمۋر دانەبايەۆتى ۇرىپ-سوعىپ، قيناعان ۆيدەوسى تارادى. وقيعا 24 تامىزدا اقمولا وبلىسى اتباسار قالاسىنداعى كولونيادا تۇسىرىلگەن. ۆيدەودا كولونيا قىزمەتكەرلەرى سوتتالۋشىنى دۋبينكامەن ۇرعانىن كورۋگە بولادى.
پىكىر قالدىرۋ