اقمولا وبلىسى كولونياسىنىڭ 9 قىزمەتكەرى بەلسەندى تيمۋر دانەبايەۆتى ۇرىپ-سوعىپ، ازاپتاعانى ءۇشىن جۇمىستان شىعارىلدى. 

قىزمەتتىك تەكسەرىس قورىتىندىسى بويىنشا جەتى قىزمەتكەر مەن ەكى باسشى ءوز لاۋازىمدارىنان ايىرىلعان. قازىرگى تاڭدا سوتقا دەيىنگى تەرگەۋ جۇمىستارى ءجۇرىپ جاتىر، ءبىراق ءىستىڭ قاي باپ بويىنشا قارالىپ جاتقانى بەلگىسىز. بۇل تۋرالى اتباسارداعى كولونياعا بارعان قۇقىق قورعاۋشى ەلەنا سەمەنوۆ الەۋمەتتىك پاراقشاسىندا جازدى.

ال قىلمىستىق-اتقارۋ جۇيەسى كوميتەتى قىلمىستىق ءىس قوزعالعانىن راستاعانمەن جۇمىستان شىعارۋ تۋرالى بۇيرىقتى ازىرگە راستامادى.

ەسكە سالا كەتەيىك، تيمۋر دانەبايەۆ – قاڭتار وقيعاسىنان كەيىن "20 مىڭ تەرروريست تۋرالى جالعان اقپارات تاراتتى" دەپ پرەزيدەنت توقايەۆتىڭ ۇستىنەن ارىز جازباق بولعان. ۋكرايناداعى سوعىسقا قارسى پىكىر ايتقان بەلسەندى بىلتىر جەلتوقساندا "ۇلتارالىق ارازدىق قوزدىردى" دەگەن كۇدىكپەن قامالعان ەدى. استانا سوتى 15 ماۋسىمدا بەلسەندىنى ءۇش جىلعا بوستاندىعىنان ايىرعان بولاتىن. 

3 قىركۇيەك كۇنى الەۋمەتتىك جەلىدە تۇرمە قىزمەتكەرلەرى اجەتحانا جۋۋدان باس تارتقان تيمۋر دانەبايەۆتى ۇرىپ-سوعىپ، قيناعان ۆيدەوسى تارادى. وقيعا 24 تامىزدا اقمولا وبلىسى اتباسار قالاسىنداعى كولونيادا تۇسىرىلگەن. ۆيدەودا كولونيا قىزمەتكەرلەرى سوتتالۋشىنى دۋبينكامەن ۇرعانىن كورۋگە بولادى. الەۋمەتتىك جەلىدەگى ۆيدەودان كەيىن ءىىم قىلمىستىق-اتقارۋ جۇيەسى كوميتەتى دانەبايەۆتىڭ ءىسى بويىنشا قىزمەتتىك تەرگەۋ باستالعانىن حابارلاعان بولاتىن.