ەلوردا اكىمى جەڭىس قاسىمبەك الەۋمەتتىك جەلىدەگى پاراقشاسىندا Pitch Day دەپ اتالاتىن كەزدەسۋ تۋرالى اقپارات جاريالادى. بۇل جيىنعا قاتىسۋشىلار ەلوردانىڭ دەنساۋلىق ساقتاۋ، ءبىلىم بەرۋ، تۇرعىن ۇي-كوممۋنالدىق شارۋاشىلىعى، تۇرعىنداردىڭ قاۋىپسىزدىگى جانە ت. ب. سالالاردى سيفرلاندىرۋعا باعىتتالعان 10 IT-جوبانى تانىستىردى.

«سيفرلىق تەحنولوگيالار – بۇگىندە كۇندەلىكتى ءومىرىمىزدى جايلى ەتەتىن ينفراقۇرىلىمنىڭ اجىراماس بولىگى. قالالىق ورتا دامۋى ءۇشىن يننوۆاسيانىڭ جولىمەن ءجۇرۋى كەرەك. ءبىز ءۇشىن مۇنداي الاڭدار – يننوۆاسيالىق يدەيالار مەن ۇسىنىستار تالقىلاناتىن جەر عانا ەمەس ءارى سول جوبالار قولداۋ تاباتىن جانە ىسكە اسىرىلاتىن ورىن. وسىعان دەيىن قالا ءبىرقاتار جوباعا، سونىڭ ىشىندە «قولجەتىمدى اۋلا» بويىنشا، سونداي-اق ءبىلىم بەرۋ، مەديسينا جانە ت. ب. سالالاردا قولداۋ كورسەتتى» دەدى اكىم.

جەڭىس قاسىمبەك ۇسىنىلعان جوبالاردى ەگجەي-تەگجەيلى زەرتتەيتىنىن ايتتى.

«سونداي-اق Pitch Day قاتىسۋشىلارىمەن بىرلەسىپ، قالالىق قىزمەتتەرىمىزدىڭ جۇمىسىن جۇيەلەندىرۋگە جانە وڭتايلاندىرۋعا مۇمكىندىك بەرەتىن جوبالار قۇرۋ بويىنشا جۇمىس ىستەيمىز. بىرەگەي يننوۆاسيالىق يدەيالارى مەن جوبالارى بار IT-ماماندار، ءبىزدىڭ ءپروفيلدى باسقارمامىزدىڭ فورۋمدارىنىڭ قاتىسۋشىسى بولا الاسىزدار. ءبىز قولداۋ كورسەتۋگە جانە بىرلەسىپ جۇمىس ىستەۋگە قاشاندا دايىنبىز» دەپ ءسوزىن تۇيىندەدى قالا باسشىسى.