كەشە «استانا – ايماقتىق ەلەكترجەلىلىك كومپانياسى» اكسيونەرلىك قوعامى نىساندارىنا بارىپ، اتقارىلعان جۇمىستاردى كوردىك. ۇلتتىق ەكونوميكا مينيسترلىگى ­تابيعي مونوپوليالاردى رەتتەۋ كوميتەتىنىڭ استانا قالاسى بو­يىنشا دەپارتامەنتى ۇيىمداستىرعان باسپا ءسوز تۋرىنا قالالىق ءماسليحات دەپۋتاتتارى، قوعامدىق كەڭەس مۇشەلەرى، استانا قالاسى كاسىپكەرلەر پالاتاسىنىڭ وكىلدەرى قاتىستى.

الدىمەن دەلەگاسيا مۇشەلەرى ­ل.ميرزويان 29پ مەكەنجايىنداعى «پنف» قوسالقى ستانساسىنا باردى. الماتى اۋدانىنداعى بىرنەشە كوشەنى ەلەكتر ەنەرگياسىمەن قامتاماسىز ەتەتىن ستانسانى قايتا قۇرۋ جۇمىسى جۇرگىزىلدى.

– اكسيونەرلىك قوعام ەلوردانى ۇزدىكسىز ەلەكتر ەنەرگياسىمەن قامتاماسىز ەتۋ ماقساتىندا 2021-2025 جىلدارعا ارنالعان ينۆەستيسيالىق باعدارلاما قابىلدادى. ونىڭ شەڭبەرىندە ەلەكتر جەلىلەرى مەن ستانسالاردى جاڭارتۋعا 23 ميلليارد تەڭگە قاراستىردى.

2023 جىلعا 4،5 ميلليارد تەڭگە قارالسا، سونىڭ 1،7 ميلليارد تەڭگەسى يگەرىلدى. «پنف» قوسالقى ستانساسى – سونداي نىساننىڭ ءبىرى. بۇل وبەكت 1985 جىلدىڭ باسىندا ىسكە قوسىلدى، سوڭعى رەت قايتا قۇرۋ جۇمىسى 2008 جىلى جۇرگىزىلدى. بۇل ستانساعا 663 ملن تەڭگە قارالىپ، وعان ترانسفورماتورلار ورناتىلىپ، بەينەباقىلاۋ جۇيەسى مونتاجدالدى، ءورت دابىلى ورناتىلدى، توق وتكىزگىشى مونتاجدالدى، كىرمە ۇياشىقتارى اۋىستىرىلدى. ناتيجەسىندە 40 مۆا ترانسفورماتورلارى نەعۇرلىم قۋاتتى 63 مۆا-عا اۋىستىرىلدى، – دەدى كومپانيا باسقارما ءتوراعاسىنىڭ ورىنباسارى رۋسلان ابجانوۆ.

ينۆەستيسيالىق باعدارلامانى ىسكە اسىرۋ ارقىلى ەلەكتر جەلىلەرىنىڭ توزۋىن جانە اپات جاعدايىن ازايتۋ، ەنەرگيانىڭ نورماتيۆتىك ىسىرابىن 10،7 پايىزدان 9،8 پايىزعا قىسقارتۋ كوزدەلىپ وتىر.

ەكىنشى نىسان – تاۋەلسىزدىك داڭعىلى مەن كۇيشى دينا كوشەسىنىڭ قيىلىسىنداعى 502-ترانسفورماتورلىق شاعىن ستانساسى. مۇندا ترانفورماتوردىڭ قوسىمشا بولشەكتەرى اۋىستىرىلدى.

ودان كەيىن دەلەگاسيا ش.قۇدايبەردى ۇلى كوشەسىندەگى «ورتالىق» شاعىن ستانساسىنا باردى. 1983 جىلى قۇرىلعان ستانسادا جاڭارتۋ جۇمىسى قارقىندى جۇرۋدە.

– بۇل ستانسادا تردن 40000 2-كۇش بەرەتىن ترانسفورماتورى اۋىستىرۋ تالاپ ەتىلدى. ت1 قىزمەت ەتۋ مەرزىمى – 40 جىل، ت2 – 49 جىل. ونىڭ جالپى قۋاتى – 63 كۆ. ودان بولەك، اكىمشىلىك عيمارات جوندەلەدى. بۇعان 908 ملن تەڭگە اقشا ءبولىندى. جوندەۋ جۇمىسى جىل سوڭىنا دەيىن اياقتالادى، – دەدى رۋسلان ابجانوۆ.

استانا قالاسىنداعى ەلەكتر ەنەرگياسى جەلىسى 33 پايىزىنىڭ توزىعى جەتكەن. بيىلعى جاڭارتۋ جۇمىسىنىڭ ناتيجەسىندە توزىعى جەتكەن جەلىنى 1 پايىزعا قىسقارتادى ەكەن. ەگەر ەلوردانىڭ ۇلعايىپ، جاڭادان تۇرعىن ۇيلەر سالىنىپ جاتقانىن ەسكەرەتىن بولساق، باس قالانىڭ باستى ماسەلەسى ەلەكتر ەنەرگياسىنا دەگەن تاپشىلىقتى شەشۋ بولادى.