بۇگىن الماتى سوتى قاڭتار وقيعاسى كەزىندە "حالىقتى بيلىك وكىلدەرىنىڭ تالاپتارىنا باعىنباۋعا شاقىردى" دەپ ايىپتالىپ، 9 ايعا قاماۋعا الىنعان ادىلەت ءمۋسيننىڭ ۇكىمىن وزگەرىسسىز قالدىردى.
ءبىراق قاماۋدا وتىرۋ مەرزىمى اياقتالعاندىقتان قاڭتارشى تۇرمەدەن بوساتىلدى. تۋىستارى ازاتتىققا ادىلەت ءمۋسيننىڭ تەرگەۋ يزولياتورىندا وتىرعان كەزدە ازاپتالعانىن ايتقان. الايدا ازاپتاۋ بويىنشا تۇسىرىلگەن شاعىم قارالمادى. بۇل تۋرالى ازاتتىق راديوسى جازدى.
ەسكە سالا كەتەيىك، تەرگەۋ ورگاندارى 2022 جىلى 4 قاڭتاردا مۋسين جۇرتتى "بيلىك وكىلدەرىنىڭ زاڭدى تالاپتارىنا باعىنباۋعا شاقىرعان" دەپ ايىپتاعان ەدى. ءمۋسيننىڭ ءوزى تاعىلعان ايىپتاردى ۇزىلدى-كەسىلدى جوققا شىعارعان بولاتىن.
