"جاقىندا وزبەكستان كوپ ايەل الۋدى ناسيحاتتاۋعا رەسمي تۇردە تىيىم سالدى. اكىمشىلىك جاۋاپكەرشىلىك جۇكتەدى. ولاردىڭ دا ماڭدايىنا “تالاقشىلاردىڭ” ىزعارى ابدەن تيگەن سياقتى"، دەپ جازادى الەۋمەتتىك جەلىدە جۋرناليست كامشات تاسبولات.
ال قازاقستاندا قاي كۇنى تەلەارنانى قوسپا، گازەت-سايت وقىما، كىلەڭ “ءۇش ايەل العان كاسىپكەر تاجىريبەسىمەن ءبولىستى”، “ەكى ايەلى بار ازامات: 10 بالامدى وكىمەت باعىپ بەرسىن”، “8 ايەلى بار ەركەك وتباسىنىڭ تاتۋ ءومىر ءسۇرىپ جاتقانىن ايتادى” دەگەندەي پوزيتيۆ سارىنداعى اقپاراتتاردان كوز سۇرىنەدى.
“قالاۋلىمنىڭ” كەز كەلگەن سانىن اشىپ قاراڭىز، بەتىندەگى بەزەۋى بەس ەلى 18-20 جاستاعى بالالار “ەكىنشى ايەل، توقال السام قالاي قارايسىز” دەپ وتىرادى قىزعا…
اينالايىن، سەن ەڭ الدىمەن بەتىڭدەگى بەزەۋىڭدى كەتىرىپ ال. سوسىن ۇيلەنىپ، ءبىر وتباسىن اسىراپ-باعىپ كور. “ەكى سيىر – ايران، ەكى ايەل – ويران” دەپ بابالارىمىز تىيعانداي، ويراننىڭ استىندا قالىپ، جۇيكە جۇيەڭدى توزدىرىپ، ءومىرىڭدى قىسقارتپا!
وزبەكستاننان ۇلگى الۋ كەرەك!
– ادامي كاپيتالى زور وزبەكستان ەلدى كەرى تارتىپ وتىرعان ماسەلەلەردىڭ ءبارىن زاڭ جۇزىندە تىيىپ، ەكونوميكالىق دامۋدىڭ داڭعىل جولىنا ءتۇسىپ جاتىر.
ءبىز كەرىتارتپالىقتاردى تىيماساق، اقپاراتتىق سالادا “كوپ ايەل” الۋ ناسيحاتتالا بەرسە، بۇل تەك ءبىر وتباسىنىڭ عانا ەمەس، مەملەكەتتىڭ تراگەدياسى!
ەستەرىڭىزدە مە، ءوز بالالارىن تەرەزەدەن لاقتىرعان ايەلدىڭ جايى، كۇيەۋىنىڭ توقال العانىن كوتەرە الماي سونداي قادامعا بارعان. ءتۇرلى اعىمنىڭ جەتەگىندە جارىلايىن دەپ جۇرگەن ادامدار كوپ.
ەۋروپاداي داميمىز دەيمىز، ەۋروپا وداعى، امەريكا ءبىزدىڭ اقپاراتتىق سالادا دەسترۋكتيۆتى اعىمداردىڭ ناسيحاتى مەن ايەل ستاتۋسىن كەمسىتۋدى كورسە، قولدايدى دەپ ويلايسىزدار ما؟
ايتپاقشى، مىندا ءۇش ايەل العان بىرەۋ “توقال الۋعا ايەلىنەن رۇقسات سۇرايتىن ەركەكتى اتۋ كەرەك” دەپتى. وسىنى ءتۇرلى سايتتار، ءتىپتى اكىمدىك قارجىلاندىراتىن گازەتتەرگە دەيىن ناسيحاتتاپ جاتىر. ادام ولتىرۋگە شاقىرۋ – تەررور!
مۇنداي سپيكەردى ينتەرۆيۋعا شاقىرماق تۇگىلى، اكىمشىلىك جاۋاپقا تارتۋ كەرەك! وسىنداي راديكالدى اقپاراتتىق ناسيحاتتى توقتاتىڭىزدار! بۇل دەسترۋكتيۆتى اعىم يدەولوگياسىن ناسيحاتتاۋمەن بىردەي، – دەيدى جازبا اۆتورى.
پىكىر قالدىرۋ