«28-29 قىركۇيەك كۇندەرى مەملەكەت باسشىسى قاسىم-جومارت توقايەۆ گەرمانيا فەدەراتيۆتىك رەسپۋبليكاسىنا رەسمي ساپارمەن بارادى»، دەگەن اقپارات جەتتى اقوردا جاقتان.

بەرليندە توقايەۆ فەدەرالدىق كانسلەر ولاف شولسپەن جانە فەدەرالدىق پرەزيدەنت فرانك-ۆالتەر شتاينمايەرمەن كەلىسسوز جۇرگىزبەك.

ەڭ قىزىعى، ءدال سول كۇندەرى ءدال سول بەرليندە ورتالىق ازيا جانە گەرمانيا مەملەكەتتەرى باسشىلارىنىڭ كەزدەسۋى جوسپارلانعان ەكەن. وعان قازاقستان پرەزيدەنتى دە شاقىرىلىپتى.

ايتا كەتسەك، وسى اپتادا عانا ورتالىق ازيا ەلدەرىنىڭ باسشىلارى نيۋ-يوركتە اقش پرەزيدەنتى بايدەنمەن كەزدەسكەن ەدى.

كەشەگى نيۋ-يوركتەگى جيىننىڭ دا، ەرتەڭگى بەرليندەگى بۇل كەزدەسۋدىڭ دە ءبىر ۇلى جوسپاردىڭ پۇشپاعى ەكەنىن اڭعارۋ قيىن ەمەس.

قىزىق بولعاندا، تاياۋ جىلدارى قازاقتىڭ باعى اشىلۋى بەك مۇمكىن. ەكى عاسىرلىق ەزگىدەن قۇتىلامىز.

بىلايشا ايتقاندا، ۆاشينگتون مەن بريۋسسەل بىرىگىپ، ورتالىق ازيا ەلدەرى مەن قازاقستان ءۇشىن ارنايى باعدارلاما ويلاستىرعان سىڭايلى. ول ارينە، ساياسي جانە ەكونوميكالىق باعدارلاما، ونىڭ جالعىز ماقساتى – وا ەلدەرى مەن قازاقستاننىڭ رەسەيدىڭ ەكى عاسىرلىق يمپەريالىق قۇرساۋىنان قۇتىلۋعا كومەك بەرۋ. بارىنشا ءقاۋىپسىز قىلىپ. رەسەيدەن شىن قۇتىلۋ ءۇشىن بارلىق تاراپ جۇمىلىپ، بىرلەسۋى كەرەك. تەك سولاي.

بالتىق ەلدەرى بىرلەسكەن قيمىلدارىنىڭ ارقاسىندا عانا رەسەيدىڭ قۇشاعىنان كوپ شىعىنسىز سىتىلىپ كەتكەن.

ال ۋكراينانىڭ رەسەيمەن ءوز بەتىنشە قوشتاسپاق نيەتى ميلليونداعان ۋكرايندىقتاردىڭ تراگەدياسىنا اكەلدى. رەسەي ۋكراينانىڭ جۇزدەگەن ەلدى مەكەنىن تۇرعىندارىمەن قوسا اياۋسىز قىرىپ تاستادى.

ايتپاقشى، رەسەي ازەربايجاندى پايدالانىپ، ارمەنيانى دا قاندى جولمەن ۋىسىندا ۇستاۋعا تىرىسۋدا.

وا ەلدەرى مەن قازاقستاننىڭ رەسەيدىڭ ىقپالىنان قۇتىلۋى – ۋاقىت ەنشىسىندەگى ماسەلە عانا.

رەسەيدىڭ «دوستىق قولىن» جالعىز ءوزىڭ قايتارۋعا بارعانىڭ – ۋكرايناداعىداي تراگەديامەن تىنادى. سونداي تراگەدياعا جول بەرمەۋ ءۇشىن اقش پەن ەۋرووداق وا ەلدەرى مەن قازاقستانعا كومەگىن بەرىپ، قاۋىپسىزدىگىن قامتاماسىز ەتۋگە دايىن وتىرعان سياقتى.