اتالعان مەرزىمدە 2022 جىلعا ارنالعان جەكە مۇلىك سالىعىن تولەۋ مەرزىمى اياقتالادى. سالىق تولەۋشىلەر: جەكە ۇيلەرى، پاتەرلەرى، ساياجايلارى، گاراجدارى جانە باسقا دا عيماراتتارى بار تۇلعالار.

الماتى قالاسى مەملەكەتتىك كىرىستەر دەپارتامەنتى باسپا ءسوز قىزمەتىنىڭ حابارلاۋىنشا، تولەم مەرزىمىنىڭ اياقتالۋىنا ساناۋلى كۇندەر قالسا دا، 55 644 الماتىلىق تۇرعىن جالپى سوماسى 735 ميلليون تەڭگە سالىق تولەمەگەن. سالىقتىڭ نەگىزگى بولىگى الماتىنىڭ مەدەۋ اۋدانى تۇرعىندارىنا، كاسىپكەرلەرىنە تيەسىلى. ونىڭ كولەمى – 315 ميلليون تەڭگە.

«تولەم مەرزىمى وتكەننەن كەيىن سالىق زاڭناماسىنىڭ نورمالارىنا سايكەس سالىقتى تولەمەگەن تۇلعالار بانكتىك قىزمەتتەردى الا المايدى، ونىڭ ىشىندە بانكتىك شوتتاردى اشۋ، اۋدارىمدار جاساۋ، نەسيە الۋ جانە ت.ب. كەشىكتىرىلگەن ءاربىر كۇن ءۇشىن 1،00 ۇلتتىق بانك بەلگىلەگەن قايتا قارجىلاندىرۋدىڭ رەسمي ستاۆكاسىنىڭ 25 ەسەلەنگەن مولشەرىندە ءوسىمپۇل الىنادى»، – دەپ حابارلادى الماتى قالالىق مەملەكەتتىك كىرىس دەپارتامەنتى.

سونىمەن قاتار، ماجبۇرلەپ ءوندىرىپ الۋ ماقساتىندا سالىق ورگاندارى سوت ورىنداۋشىلارىنا سالىق ۇيعارىمدارىن جىبەرەدى، ولار بورىشكەرلەرگە، ونىڭ ىشىندە مۇلكىنە جانە بانك شوتتارىنا تىيىم سالۋ، سونداي-اق ەلدەن تىسقارى جەرلەرگە شىعۋدى شەكتەۋ شارالارىن قابىلدايدى. مۇنداي جاعدايلاردا سالىق بەرەشەگىنەن بولەك قارىز سوماسىنىڭ 25 پايىزىن قۇرايتىن سوت شىعىندارى ۇستالادى.

سالىق تولەمەۋگە بايلانىستى كەلەڭسىز جاعدايلاردى بولدىرماۋ ءۇشىن سالىق قىزمەتكەرلەرى جەكە تۇلعالارعا جاقىن كۇندەرى مۇلىك سالىعىن تولەۋدى ەسكەرتەدى.