فەيسبۋكتە قوعام بەلسەندىسى ايگۇل ورىنبەك بىلاي دەپ جازدى:
قۇرمەتتى پرەزيدەنت!
سىزگە جانىڭىزدا جۇرگەندەر بايانداماي، جاسىرىپ وتىرعان بولۋى كەرەك!
حالىقتىڭ اماناتىن، جانايقايىن جەتكىزەيىن!
وڭتۇستىكتە ۇن باعاسى – 15 مىڭ تەڭگە.
قانت باعاسى – 13 مىڭ تەڭگەگە ءبىر-اق شىقتى!
ازىق-تۇلىك باعاسىن جەرگىلىكتى اكىمدەر باقىلاۋدا ۇستاي الماي وتىر.
سمايلوۆ باسقارعان ۇكىمەتپەن بۇل قىستان شىعا المايمىز!
ازىق-تۇلىك باعاسىن ۇستاي الماي وتىرعان ۇكىمەتباسى بىزگە كەرەك پە؟
دەپۋتاتتار، ءاۋ دەسەڭدەرشى، بارسىڭدار ما؟
ماجىلىستە وتىرعان وڭتۇستىكتىڭ دەپۋتاتتارى، ۇندەمەي، باس شۇلعىپ وتىرۋعا باردىڭدار ما؟
شىعارساڭدارشى داۋىستارىڭدى، سۇراساڭدارشى ۇكىمەتتەن، ۇن مەن قانتتىڭ باعاسى قايدا ۇشىپ بارادى؟
پرەزيدەنت تاپسىرما بەرمەسە، جۇمىس ىستەمەيتىن ۇكىمەتباسى وتستاۆكاعا كەتۋى كەرەك!
قىمباتشىلىق قىسىپ جاتىر
راس، كوكونىس پەن ازىق-تۇلىك، ناننىڭ، ۇننىڭ جانە باسقانىڭ باعاسى شارىقتاپ جاتىر. رەسەي، قىتايدان كەلەتىن كيىم-كەشەك تۇگىلى، قىرعىزستان مەن وزبەكستان ۇساق-تۇيەك زاتتارىنا دەيىن بىزگە قىمباتقا ساتا باستادى. ەندى بۇعان كۇزگى ناۋقاندى جەلەۋ ەتىپ بەنزين بەزگەگى قوسىلىپ، ەلدە ديزەل باعاسى اسپانداپ كەتۋى ابدەن مۇمكىن.
ۇكىمەتتە ينفلياسيامەن بىتپەيتىن كۇرەس ءجۇرىپ جاتىر. ماماندارىنىڭ پايىمداۋىنشا، ۇكىمەتتىڭ قىمباتشىلىققا قاتىستى قازىرگى ۇستانىپ وتىرعان باعىتى سامارقاۋ جانە ساۋاتسىز.
ماسەلەن، بۇعان دەيىن بىزدە «قاراپايىم زاتتار ەكونوميكاسى» دەگەن باعدارلاما جۇزەگە اسۋى كەرەك ەدى. باسقاسىنان بولەك، وسى باعدارلامانى ۇكىمەت ساۋاتتى جۇرگىزە العاندا قىتايدان تىم قۇرىعاندا ينە-جىپ، شەگە، كەسە، قاسىق ءتارىزدى ۇساق-تۇيەكتەردى ساتىپ المايتىن ەدىك. امال نەشىك، ءوندىرىسى ارتتا قالعان ەل رەتىندە ءبىز بۇگىندە شيەتتەي نارسەنىڭ ءوزىن وزگە ەلدەن الۋعا ءماجبۇرمىز، دەيدى ساراپشىلار.
ەلدەگى قىمباتشىلىق دەڭگەيىنىڭ وسكەنىنە قاتىستى ساراپشىلار بىزدە ينفلياسيامەن كۇرەسۋدەن بولەك ونى ەسەپتەۋ ءادىسى دە دۇرىس قالىپتاسپاعانىن ايتىپ وتىر. بۇل رەتتە ەكونوميست-عالىم ءىلياس يسايەۆ:
قىمباتشىلىقتى جۇگەندەۋگە قاتىستى پرەزيدەنت توقايەۆ ۇكىمەتكە قايتا-قايتا تاپسىرما بەرىپ جاتىر. بۇل رەتتە ۇلتتىق ەكونوميكا مينيسترلىگى، قارجى مينيسترلىگى، ساۋدا جانە ينتەگراسيا مينيسترلىگى، باسكەلەستىكتى قورعاۋ اگەنتتىگى تىزە قوسىپ جۇمىس ىستەۋى كەرەكتىگى دە ناقتى ايتىلدى. اتتەگەن-ايى، بۇل ۆەدموستۆالاردىڭ ەلدەگى مونوپوليستەردى تەزگە سالۋعا مىسى جەتپەي تۇر.
التىن كۇمىسبەك
پىكىر قالدىرۋ