شەشەنستان باسشىسى رامزان قادىروۆ ۇلى ادامنىڭ قاماۋداعى ازاماتتى ۇرىپ-سوققان ۆيدەوسىن جاريالادى. ول ۆيدەونىڭ استىنا ءوز ۇلىمەن ماقتاناتىنىن جەتكىزدى. بۇل تۋرالى ول ءوزىنىڭ Telegram ارناسىندا جازعان.
ۆيدەودا قادىروۆتىڭ ۇلى قاماۋدا وتىرعان نيكيتا جۋراۆەلدى ۇرىپ، تەپكىلەگەنى بايقالادى. ال نيكيتا جۋراۆەل قارسىلىق بىلدىرمەي، قورعانۋعا تىرىسقان. قادىروۆتىڭ ايتۋىنشا نيكيتا جۋراۆەل قۇران ورتەپ، قاسيەتتى كىتاپقا قۇرمەتسىزدىك تانىتقان.
"الەۋمەتتىك جەلىدە ۇلىم ادامنىڭ قاسيەتتى قۇران كىتاپتى ورتەگەن نيكيتا جۋراۆەلدى سوققىعا جىققانى جونىندە قىزۋ تالقىلاۋ بولىپ جاتىر. بۇل راس وقيعا. مەنىڭشە، قاسيەتتى كىتاپتى ورتەگەن، قۇرمەتسىزدىك تانىتقان كەز كەلگەن ادام قاتاڭ جازالانۋى ءتيىس. ال ۇلىم ادامنىڭ ءىسىن ماقتان تۇتامىن"، دەپ جازعان رامزان قادىروۆ.
بۇدان بولەك رامزان قادىروۆ نيكيتا جۋراۆەلدى "ۋكراينا ارناۋلى قىزمەتىنىڭ قولشوقپارى" دەپ اتاعان. ول "مەملەكەت تولەرانتتى، ءتوزىمدى، ءبىر-بىرىن قۇرمەتتەيتىن قوعام قالىپتاستىرىپ جاتقاندا، جۋراۆەل سياقتى ارانداتۋشىلار كەدەرگى جاسايدى"، دەپ جازعان.
پىكىر قالدىرۋ