باسپالداقتان قۇلاعان بالانىڭ باس سۇيەگى زاقىمدانىپ، ميى شايقالعان. باسپالداقتىڭ ءبىر جاعىندا قورشاۋ بولماعان. سوندىقتان اتا-انا قاۋىپسىزدىك شارالارىن ساقتاماعان باسشىلاردىڭ جازاعا تارتىلۋىن تالاپ ەتۋدە. مەكتەپ ديرەكتورى وقۋشىنى سىنىپتاسى يتەرىپ جىبەرگەنىن ايتادى.

وقيعا  18 قىركۇيەك كۇنى استاناداعى №14-مەكتەپتە بولعان. بەينەباقىلاۋ كامەراسىنا تاميرلان كارىمقۇلوۆتىڭ ەكىنشى قاباتتىڭ باسپالداعىنان قۇلاعان ءساتى جازىلىپ قالعان. سەگىز جاستاعى جەتكىنشەك وسى باسپالداق پەن قابىرعا اراسىنداعى اشىق جەردەن قۇلاپ كەتكەن.

“باسى بەس جەردەن سىنعان. ايتۋلارىنشا، كوزدىڭ ءۇستى سىنعان. كوزدىڭ ارتىنا سۇيەك تۇرىپ قالعان. بۇگىن كوزدىڭ جانى دا سىنعان دەيدى. مۇندا جوندەۋ جۇمىسى جاسالعان كەزدە نەگە تەكسەرمەگەن؟. ءبىر دە ءبىر باسپالداقتا قورشاۋ جوق. كەشە قۇلاعاننان كەيىن بارىپ ىستەدى"، – دەدى تاميرلان كارىمقۇلوۆتىڭ اكەسى بەكجان قوجامقۇلوۆ.

تاميرلان قۇلاعان ساتتە مۇعالىمدەر جەدەل جاردەم شاقىرعان. الايدا مەديسينا قىزمەتكەرلەرى ۋاقىتىندا كەلمەپتى.

جەدەل جاردەم 17:10-دا شاقىرىلعان. ول التىدان اسا كەلدى. اكىمدىككە حابارلاسىپ، شاقىرتتىم. سودان كەيىن عانا كەلدى، ايتپەسە كەلەر ءتۇرى جوق. بالامدى ەمدەتۋ ءۇشىن قانشاما قاراجات كەرەك بىلمەيمىن”، – دەيدى بالانىڭ اكەسى. 

مەكتەپ ديرەكتورى وسى جاعدايدان كەيىن عانا ءقاۋىپتى باسپالداقتاردىڭ ءبىر جاعى قورشالعانىن راستادى. ايتۋىنشا، توتەنشە جاعدايلار دەپارتامەنتىنىڭ وكىلدەرى بۇعان دەيىن بىرنەشە رەت ءبىلىم ۇياسى عيماراتىنا تەكسەرۋ جۇرگىزگەن. ماماندار اشىق تۇرعان ىشكى ساتىلار بالا ومىرىنە ءقاۋىپسىز دەگەن قورىتىندى شىعارعان ەكەن.

“جۇيەلى تۇردە تجد، سەس تاراپىنان تەكسەرۋلەر جۇرگىزىلەدى. بۇل باسپالداقتار بويىنشا ەسكەرتۋ بولمادى. 2 "د" سىنىپ وقۋشىلارىن ءمۇعالىمى جەتەكتەپ، ينفورماتيكا ساباعىنا ەكىنشى قاباتقا كوتەرىلىپ بارا جاتقان كەزدە سىنىپتاستار بىر-بىرىمەن ويناپ، ءبىر سىنىپتاسى يتەرىپ جىبەرگەن”، – دەدى استانا قالاسى №14 مەكتەپ-گيمنازياسىنىڭ ديرەكتورى ديدار بايتاسوۆ. 

دارىگەرلەر تاميرلاننىڭ دەنساۋلىعى ءالى دە ورتاشا اۋىر جاعدايدا دەپ باعالاپ وتىر. جەتكىنشەك ەسىن جيعان.

بۇعان بايلانىستى پوليسەيلەر "بالالاردىڭ ءومىرى مەن دەنساۋلىعىنىڭ قاۋىپسىزدىگىن قامتاماسىز ەتۋ جونىندەگى مىندەتتەردى ورىنداماۋ" بابى بويىنشا قىلمىستىق ءىس قوزعاعان. تاميرلاندى باسپالداقتان يتەرىپ جىبەردى دەگەن دەرەك تەكسەرىلىپ جاتىر.

ەسكە سالا كەتەيىك،  استانانىڭ №14 مەكتەپ-گيمنازياسىندا جازاتايىم وقيعا بولىپ، وقۋشىلاردىڭ ءبىرى باسپالداقتان قۇلاپ كەتكەن. استانانىڭ ءبىلىم باسقارماسى 25 قىركۇيەك كۇنى وقۋشىنى سىنىپتاسى يتەرىپ جىبەرگەنىن مالىمدەگەن ەدى.