شىمكەنتتە ۇلكەن سوت پروسەسى ءوتتى. ساۋد ارابياسىنداعى قاسيەتتى مەكەنگە بارامىز دەپ الدانعان الماتى مەن شىمكەنت تۇرعىندارى فيرماعا مىڭ دوللاردان كەم تۇسپەيتىن اقشا سالعان. قاجىلىققا تىركەلگەندەردىڭ ءبىر قاتارى ەلدەن ۇشىپ كەتە الماسا، ءبىر توبى شەتەلدە قاراجاتسىز، اس-سۋسىز قالىپ قويدى.
سوت باستالار الدىندا سوتتالۋشى جۋرناليستەرمەن سويلەسىپ، ءىستىڭ جاي-جاپسارىن بولىسكىسى كەلەتىنىن ءبىلدىردى.
«ۇلتتىق قاۋىپسىزدىك كوميتەتىنە، شىمكەنت قالالىق ىىب-نە، قۇزىرلى ورگاندارعا ارىز جازدىم. بۇل ىسكە بەكبولات تىلەۋحانوۆتى دا قوسۋ كەرەك. ول الدانعان ادامداردىڭ اقشاسىن تۇگەل الىپ كەتكەن، ءبىراق قانداي دا ءبىر سەبەپتەرمەن بۇل ءىس بويىنشا ايىپتالماي وتىر»، – دەدى سوتتالۋشى سوت باستالار الدىندا.
سوتتا 300-گە جۋىق ادام كۋاگەر بولدى. زارداپ شەككەندەر بۇدان دا كوپ بولۋى مۇمكىن. سوت وتىرىسىندا پروكۋرور 4 جىل 8 ايعا باس بوستاندىعىنان ايىرۋدى سۇرادى.
«سوتتىڭ ۇكىمىمەن سوتتالۋشى كىنالى دەپ تانىلىپ، 6 جىلعا باس بوستاندىعىنان ايىرىلدى. جازاسىن قاۋىپسىزدىگى ورتاشا مەكەمەدە وتەيدى»، – دەپ ۇكىمدى سۋديا اينەل وراقبايەۆا وقىدى.
تۋريستىك اگەنتتىك ديرەكتورى ءوز كىناسىن مويىندامادى.
ەستەرىڭىزگە سالا كەتەيىك، جانجال وسى جىلدىڭ قاڭتار ايىندا بولدى. سوت پروسەسى شىلدە ايىندا باستالدى. سوت بۇل ءىس بويىنشا جابىرلەنۋشىلەر مەن كۋاگەرلەردەن ەكى ايعا جۋىق جاۋاپ العان.
پىكىر قالدىرۋ