شىراقشىلار، يتتەر مۇردەلەردى جەپ كەتپەس ءۇشىن كۇندىز-تۇنى كۇزەتىپ جۇرگەندەرىن ايتادى. بۇرالقى يتتەر ءتىپتى ادامدارعا دا شابۋىلداي باستاعان كورىنەدى. جىل باسىنان بەرى يت قاۋىپ، اۋرۋحاناعا تۇسكەندەر سانى 1700-گە جۋىقتاعان. 

شىمكەنتتە قاڭعىباس يتتەر مولا ارالاپ، قابىرلەردى قازىپ ءجۇر. ىنتىماق شاعىناۋدانىنىڭ تۇرعىندارى وسىلاي دەپ دابىل قاعۋدا. سوزدەرىنشە، يتتەر تاڭەرتەڭنەن كەش باتقانعا دەيىن تىنباي ءقابىر ارشيدى. مازارات شىراقشىلارى قاڭعىباس ءتورت اياقتىلاردىڭ قازعان جەرىن كومىپ الەكپىز دەيدى. ال بەيىتتەردىڭ باسىندا يتتەردىڭ تابان ىزدەرى مەن ناجىستەرى جاتقان كورىنەدى.

شۋحراتبەك يسرايلوۆ، شىراقشى: «يتتەردەن  شارشادىق، كۇنىگە قازىپ جاتىر، قانشاسىن قۋىپ جاتىرمىز. ارىز بەردىك، نە بولماي جاتىر. ءىش جاعىنا دەيىن قازىپ جاتىر. جاقىندا بۇل مايىتتەردى سىرتقا شىعارىپ، جەي مە بىلمەيمىن. مىنە قازىپ-قازىپ، ارتتارىنان كومىپ شىعىپ جاتىرمىز. يت اتاتىندار اتا المايدى ونى، وعى 3 مەترگە عانا جەتەدى وعى.»

تۇرعىنداردىڭ سوزىنشە دانىككەن يتتەر ەندى كوشەدەگى ادامدارعا دا شابۋىل جاساي باستاعان. اسىرەسە مەكتەپ وقۋشىلارى زارداپ شەگىپ وتىر ەكەن. تۇرعىندار جاقىندا عانا يت تالاعان بالانى ارەڭ الىپ قالعانىن ايتادى.

شىمكەنتتە يت اۋلاۋمەن اينالىساتىن 6 بريگادا بار ەكەن. ولار بىلتىر 40 مىڭ قاڭعىباس يت-مىسىق اۋلاسا، بيىل بار بولعانى 16 مىڭ 800 بۇرالقىنى ۇستاپتى. جاۋاپتى باسشىلار يت-مىسىقتاردى جاپپاي جويۋعا زاڭ مۇمكىندىك بەرمەيدى دەپ وتىر.

دەگەنمەن، جاۋاپتىلاردىڭ جۇمىسىنا تۇرعىنداردىڭ كوڭىلى تولماي وتىر. سەبەبى كوشەلەردە قاڭعىباس يتتەر ازايار ەمەس. ايتا كەتەيىك، جابايى جانۋارلاردى اۋلاپ، كاستراسيا جاساپ، بيۋدجەتتەن جويۋعا 264 ميلليون تەڭگە بولىنگەن.