– ءىس پروكۋراتۋرادا. پروكۋراتۋرا ءىستى سوتقا جىبەرۋ-جىبەرمەۋ ماسەلەسىن 5-10 كۇننىڭ ىشىندە شەشەدى، – دەدى مەيىرجان دوسقارايەۆ ازاتتىق تىلشىسىنە.

كەيىنگى كەزدە بيلىكتى قاتاڭ سىناپ، بەيبىت اكسيالارعا قاتىسىپ كەلگەن 60 جاستاعى بەلسەندى مارات جىلانبايەۆ "تىيىم سالىنعان ۇيىمنىڭ ىسىنە ارالاسۋ" جانە "ەكسترەميستىك ۇيىمدى قارجىلاندىرۋ" باپتارى بويىنشا كۇدىككە ءىلىنىپ، مامىر ايىندا قامالعان. سوڭعى رەت ونىڭ قاماۋ مەرزىمى 20 قازانعا دەيىن ۇزارتىلعان. تانىمال مارافونشى، بيلىك سىنشىسى، ازاماتتىق بەلسەندى مارات جىلانبايەۆ تاعىلعان ايىپتاردى جوققا شىعارعان. قۇقىق قورعاۋشىلار قاۋىمداستىعى ونىڭ ءىسىنىڭ ساياسيلانعانىن ايتىپ، ونى "ساياسي تۇتقىن" دەپ تانىعان. 

استانادا تەرگەۋ يزولياتورىندا قاماۋدا جاتقان بەلسەندىنىڭ دەنساۋلىعى ناشارلاعانى تۋرالى اقپارات بولعان. ادۆوكاتىنىڭ ايتۋىنشا، "بۇعان دەيىن ونىڭ ءتىسساۋىتى ءتۇسىپ قالعان، ءقازىر ول جوندەتىلگەن". "ءقازىر كوڭىل-كۇيى ورىسشا ايتقاندا "بويەۆوە" دەدى ادۆوكات.

"ەندى ايىپتىڭ ءبارى وسى ماراتتىڭ ميتينگىگە شىققانى، بيلىككە قاتىستى ايتقان سىندارىنا قاتىستى. بيىل پارلامەنت سايلاۋىندا ادامدار ونى قولداپ، اقشا جىبەردى عوي. "العا، قازاقستان" پارتياسىن قۇرۋ بويىنشا ۇيىمداستىرۋ توبىنىڭ ادامدارى سايلاۋعا قاتىسامىز دەپ نيەت بىلدىرگەن ادامداردىڭ بارلىعىنا ولارعا دا تۇسكەن اقشادان جاردەمدەستى عوي. ەندى سونى "تەرروريزمدى قارجىلاندىرۋ" دەيدى. قايداعى تەرروريزم؟ قايداعى قارجىلاندىرۋ؟ قارجىنىڭ بارلىعى سايلاۋعا قاتىسۋ جارناسى بار عوي (1 ملن تەڭگەدەن استام قاراجات) سولارعا كەتتى عوي. ءبىر تيىن دا جىلانبايەۆتىڭ قالتاسىنا تۇسكەن جوق" دەيدى مەيىرجان دوسقارايەۆ.

مارات جىلانبايەۆ بيىل كەزەكتەن تىس پارلامەنت سايلاۋىنا دەپۋتاتتىقتان ۇمىتكەر رەتىندە تىركەلگەن. بيلىك ونى "ەرتە ۇگىت-ناسيحات جاسادى" دەپ ايىپتاپ، وعان اكىمشىلىك ءىس قوزعادى. اقىرى ونى كانديداتتار قاتارىنان الىپ تاستادى.

ءوزىنىڭ سايلاۋالدى باعدارلاماسىندا جىلانبايەۆ قاڭتار وقيعاسىن تەرگەۋدى، قانتوگىستەن زارداپ شەككەندەرگە وتەماقى تولەۋدى، بۇرىنعى پرەزيدەنت نۇرسۇلتان نازاربايەۆ پەن ونىڭ وتباسىنا قاتىستى تەرگەۋ جۇرگىزۋگە شاقىرعان.

بيلىك ول تىركەمەك بولعان وپپوزيسيالىق "العا، قازاقستان" پارتياسىنىڭ تىركەۋ تۋرالى ءوتىنىشىن تالاي كەرى قايتاردى.

الەمنىڭ 39 ەلىندە دەموكراتيا بەلسەندىلەرى مەن قۇقىق قورعاۋشىلار، ادۆوكاتتار مەن جۋرناليستەردى بىرىكتىرەتىن World Liberty Congress ۇكىمەتتىك ەمەس ۇيىمى جۋىردا "مارات جىلانبايەۆ ءجون-جوسىقسىز ۇستالدى" دەپ تانىعان.