بيىلعى قاجىلىق ماۋسىمىنىڭ باستى ەرەكشەلىگى 15 جەلتوقسانعا دەيىن تىركەلگەن ازاماتتار عانا قاسيەتتى مەكەنگە بارا الادى. سەبەبى ساۋد ارابيا كورولدىگى قاجىلىق جانە ۇمرا مينيسترلىگىنىڭ تالابى بويىنشا «قاجىلىق-2024» ماۋسىمىنا بيىل 15 جەلتوقسانعا دەيىن قاجىلارى تىركەلىپ بىتكەن ەلدەرگە قاجىلىق ورىندارى بولىنبەك.
ياعني، 15 جەلتوقسانعا دەيىن قاجىلىقتىڭ ەلەكتروندى جۇيەسىنە تىركەلىپ، سول جۇيەدەن الىناتىن قىزمەت تۇرلەرىنە (قوناق ءۇي، مينا، ارافات جانە ت.ب. قىزمەتتەرى) قاراجاتى تولەنگەن كىسى سانىنىڭ كولەمىنە ساي، قازاقستان ازاماتتارى ءۇشىن قاجىلىق ورىندارىنىڭ سانى ايقىن بولماق.
وسىعان وراي، قازاقستان مۇسىلماندارى ءدىني باسقارماسى 2024 جىلعى قاجىلىق ماۋسىمىندا ازاماتتارعا قاجىلىق ساپارىن ۇيىمداستىرۋعا قابىلەتتى تۋروپەراتورلار اراسىندا اشىق كونكۋرس جاريالاعان بولاتىن. كونكۋرس بويىنشا 7-17 قىركۇيەك ارالىعىندا تۋروپەراتورلاردان قۇجاتتار قابىلدادى.
قاجىلىقپەن اينالىساتىن تۋروپەراتورلاردى انىقتاۋ ءۇشىن ارنايى كوميسسيا مۇشەلەرى بەكىتىلدى. تۋروپەراتورلاردى تاڭداۋدا اشىقتىقتى قامتاماسىز ەتۋ ماقساتىندا «ۇمىتكەر تۋروپەراتورلارعا قاجىلىق ورىندارىن ءبولۋ» تۋرالى قمدب ەرەجەسى باستى نازارعا الىندى.
كونكۋرسقا 31 تۋركومپانيا قۇجات وتكىزدى. ونىڭ ىشىندە كونكۋرسقا قاتىسۋدىڭ باستى تالاپتارىنا سايكەس كەلەتىن 17 تۋروپەراتور كونكۋرسقا جىبەرىلدى. قالعان 14 تۋرفيرمانىڭ كونكۋرس شارتتارىنا سايكەس كەلمەۋى سەبەبىنەن كونكۋرسقا جىبەرىلمەدى.
تۋروپەراتورلاردان كەلگەن وتىنىشتەر مەن تالاپ ەتىلگەن قۇجاتتار ورتاعا سالىنىپ، ءارقايسىسى مۇقيات قارالدى. كوميسسيا مۇشەلەرى جوعارىداعى ەرەجەگە سۇيەنە وتىرىپ، تۋروپەراتورلارعا قوسىمشادا كورسەتىلگەندەي باللدىق جۇيەمەن باعا بەردى.
كونكۋرستان ءوتىپ، ساۋد ارابيا كورولدىگى قاجىلىق جانە ۇمرا مينيسترلىگىنە قاراستى قاجىلىقتىڭ ەلەكتروندى جۇيەسىنە رەسمي تىركەلەتىن 17 تۋروپەراتور وسى جىلدىڭ 15 جەلتوقسانىنا دەيىن جيناعان قاجىلارى مەن قارجىلىق مۇمكىنشىلىگىنە قاراي قاجىلىق ورىندارىن الاتىن بولادى.
ال كونكۋرسقا جىبەرىلمەگەن تۋركومپانيالار رەسمي 17 تۋروپەراتوردىڭ بىرىمەن اگەنتتىك كەلىسىم-شارت قۇرۋى نەگىزىندە 100 (ءجۇز) قاجىلىق ورنىنا دەيىن الۋىنا بولادى دەلىنگەن.
پىكىر قالدىرۋ