اقتاۋداعى "ويماشا" وقۋ پوليگونىندا جارىلىس بولىپ ءبىر سارباز قازا تاپتى، دەپ حابارلايدى Lada.kz اقپارات اگەنتتىگى. ءقازىر وسى جاعدايعا بايلانىستى سوتقا دەيىنگى تەرگەۋ جۇمىستارى جۇرگىزىلىپ جاتىر.
"قىلمىستىق كودەكستىڭ 453-بابى، 2-بولىگى (قىزمەتكە سالعىرت قاراۋ، ادام ولىمىنە اكەپ سوققان ارەكەت) بويىنشا ءىس قوزعالدى. ءولىمنىڭ ناقتى سەبەبىن انىقتاۋ ماقساتىندا ءمايىتتى اشىپ قاراعان. قازىرگى كەزدە ساراپتامانىڭ ناتيجەسىن كۇتىپ وتىرمىز. جارىقشاقتار تابىلعان جاعدايدا قوسىمشا ساراپتاما تاعايىندالادى. سەبەبى بوگدە زاتتىڭ قۇرامى مەن شىققان جەرىن انىقتاۋ قاجەت"، - دەدى اقتاۋ گارنيزونىنىڭ باس اسكەري پروكۋرورى ەرلان قۇتقوجا.
جارىلىس پوليگوننىڭ وقۋ-جاتتىعۋلار وتەتىن جەردە ەمەس، باسقا جاعىندا بولعان. سول كەزدە ساربازدار تۇرمىستىق كۇل-قوقىستى جيناپ جۇرگەن.
"جارىلىس كەزىندە تاعى ءبىر كەلىسىمشارت بويىنشا اسكەري قىزمەتشى، 2000 جىلى تۋعان سەرجانت جاراقات الدى. وعان جەلكە تۇسىنان تيگەن. ءقازىر ول اۋرۋحانادا، جاعدايى جاقسى، ءومىرى مەن دەنساۋلىعىنا ءقاۋىپ ءتونىپ تۇرعان جوق"، - دەپ اتاپ كورسەتتى گارنيزونىنىڭ باس اسكەري پروكۋرورى.
پىكىر قالدىرۋ