شەشەنستان پرەزيدەنتى رامزان قادىروۆتىڭ 24 جاستاعى قىزى ايشات قادىروۆا الەۋمەتتىك ماسەلە بويىنشا شەشەنستان ۇكىمەتىنىڭ ۆيسە-پرەمەرى بولىپ تاعايىندالادى. رامزان قادىروۆ قىزىنىڭ تاعايىندالۋىن ماقۇلداعان.
بۇعان دەيىن ايشات قادىروۆا مادەنيەت مينيسترلىگىن باسقاردى. بىرنەشە اي بۇرىن ونىڭ جۇبايى ۆيسحان ماسۋيەۆ ۇكىمەت ءتوراعاسىنىڭ ورىنباسارى قىزمەتىنە تاعايىندالدى. قادىروۆتىڭ ءوزى تۋىستارىنا سەنىم بىلدىرگەندىكتەن ولاردى ماڭىزدى لاۋازىمعا تاعايىنداعانىن ايتقان.
"مەن مۋسليم حۋچييەۆتىڭ ۇسىنىستارىن قولدادىم. ارينە، ايشات قادىروۆا مادەنيەت مينيسترلىگىنىڭ قىزمەتىن جاقسارتۋعا زور ۇلەس قوستى، جاقسى تاجىريبە جينادى"، - دەپ جازدى قادىروۆ.
ايشات قادىروۆا 21 جاسىنان باستاپ شەشەنستان مادەنيەت ءمينيسترىنىڭ ورىنباسارى، ءمينيسترى بولعان. "وتان الدىنداعى ەڭبەگى ءۇشىن"، "ادام قۇقىعىن قورعاعانى ءۇشىن"، "شەشەنستان رەسپۋبليكاسىنا سىڭىرگەن ەڭبەگى ءۇشىن" مەدالدارى مەن رەسەي قوسىپ العان، حالىقارالىق دەڭگەيدە مويىندالماعان "ءدحر-دىڭ" "دوستىق" وردەنىمەن، شەشەنستاننىڭ ەڭ جوعارعى ماراپاتى - قادىروۆ وردەنىمەن ماراپاتتالعان.
پىكىر قالدىرۋ