كەشە ءال-فارابي اتىنداعى قازۇۋ-دا پرەزيدەنت قاسىم-جومارت توقايەۆتىڭ اكەسى كەمەل توقايەۆقا ارنالعان ارنايى اۋديتوريا اشىلدى.
ارينە، قازاق جازۋشىسى بولعان سوڭ، اشىلسىن.
ءبىراق وسى ۋاقىتقا دەيىن ءدال مۇنشالىق ەلەنبەي كەلگەن جازۋشىنى اياق استىنان جارىسا دارىپتەگەندەرى قىزىق بوپ جاتىر.
الدە، جانسەيىت تۇيمەبايەۆ رەكتورلىق قىزمەتىنەن كەتپەۋ ءۇشىن جانتالاسا ما ەكەن؟ ويتكەنى مۇنىڭ الدىندا «قازۇۋ-دىڭ رەكتورى اۋىسادى» دەگەن سىبىستار بولعان.
ازاتتىق راديوسىنىڭ جۋرناليستەرى رەكتورعا “بۇل اۋديتوريا كەمەل توقايەۆ پرەزيدەنتتىڭ اكەسى بولعانى ءۇشىن اشىلدى ما، بۇل جەكە باسقا تابىنۋ ەمەس پە”، دەگەندەي سۇراق قويىپ جىبەردى. توتەسىنەن قويىلعان سۇراق جانسەيىت تۇيمەبايەۆتىڭ جانىنا قاتتى ءتيىپ كەتسە كەرەك،  اشىنعان ول ءجۋرناليستىڭ وزىنە شاپ بەردى. ونىڭ بۇل ارەكەتىن كوپشىلىك ينتەلليگەنت ادامعا ءتان قىلىق ەمەس دەپ باعالاۋدا.
جۋرناليست قاسىم امانجول: «ءوزىن زيالى سانايتىن ادام ەشقاشان سۇحبات بەرىپ تۇرىپ ءجۋرناليستىڭ قولىنداعى ميكروفونعا جارماسپايدى. قازاق ۇلتتىق ۋنيۆەرسيتەتى رەكتورىنىڭ ءتىلشى قولىنداعى ميكروفوندى يەسىنىڭ قولىمەن بىرگە قىسا ۇستاپ، كەرى كۇشتەپ بۇرىپ، «ماقساتىڭىز قانداي» دەپ سۇراق قويۋىن قالاي باعالايسىز؟ بۇل – رەكتورعا، ينتەلليگەنتكە، جالپى مادەنيەتتى ەر-ازاماتقا جاراساتىن قىلىق پا؟» دەگەن ساۋال تاستايدى.
ارتىنشا ۋنيۆەرسيتەت ستۋدەنتتەرىنە «كەمەل توقايەۆ كىم؟» دەگەن سۇراق قويعاندا، كوبى «پرەزيدەنتتىڭ اكەسى» دەگەن جاۋاپتان اسا المادى. ءتىپتى كەمەل توقايەۆتىڭ كىم ەكەنىن بىلمەيتىندەر دە تابىلدى. ەندى ءبىرى «بۇل جاعىمپازدىققا ۇقسايدى» دەپ، شىنىن ايتتى.
اتىنا شاڭ جۇقتىرمايتىن رەكتور ەندى ستۋدەنتتەردى جازالاماسا بولدى.