سوڭعى ءتورت جارىم جىلدا ۇيدەگى زورلىق-زومبىلىقتان 869 ادام كوز جۇمدى. بۇل تۋرالى مادەنيەت جانە اقپارات ءمينيسترى ايدا بالايەۆا مالىمدەدى.
مينيستر پرەزيدەنت وتباسىلىق-تۇرمىستىق زورلىق-زومبىلىقتىڭ كەز كەلگەن ءتۇرى، ونىڭ ىشىندە كامەلەتكە تولماعان بالالارعا جاسالعان قاستاندىق ءۇشىن جازانى كۇشەيتۋ ماسەلەسىن ۇنەمى كوتەرىپ كەلە جاتقانىن اتاپ ءوتتى.
"بۇگىنگى ستاتيستيكا كوڭىل كونشىتپەيدى. سوڭعى ءتورت جارىم جىلدا ۇيدەگى زورلىق-زومبىلىقتان 869 ادام كوز جۇمدى. دەنساۋلىققا اۋىر زيان كەلتىرۋدىڭ 2086 فاكتىسى تىركەلگەن. سوندىقتان الدىن الۋ شارالارىن كەشەندى تۇردە جۇرگىزۋ ءبىزدىڭ ءجىتى نازارىمىزدا"، - دەدى بالايەۆا ۇكىمەت وتىرىسىندا.
ايتۋىنشا، وتباسىلارعا جان-جاقتى كومەك كورسەتۋ ءۇشىن وڭىرلەردە 68 وتباسىن قولداۋ ورتالىعى جۇمىس ىستەيدى، ونىڭ 19-ى ۋاقىتشا باسپانامەن قامتاماسىز ەتەدى.
"بۇل تاجىريبە 2019 جىلدان بەرى بار. جاردەمگە مۇقتاج ازاماتتارعا "ءبىر تەرەزە" قاعيداتى بويىنشا كومەك كورسەتىلۋدە. ورتالىقتار پسيحولوگيالىق، الەۋمەتتىك جانە قۇقىقتىق كومەك كورسەتۋمەن قاتار وتباسى ينستيتۋتىن نىعايتۋعا جان-جاقتى قولداۋ جاسايدى"، - دەدى مينيستر.
پىكىر قالدىرۋ