بۇگىن ءماجىلىس وتىرىسىندا دەپۋتات رينات زايىتوۆ قورعانىس مينيسترىنە لاۋازىمدى تۇلعالار مەن بالالارىن اسكەري دايىدىققا مىندەتتەۋ تۋرالى سۇراق قويدى.
"مەن وسى ۋاقىتقا دەيىن ءمينيستردىڭ بالاسى، اكىمنىڭ بالاسى اسكەردە ءجۇر دەگەندى ەستىمەدىم. قاتەلەسۋىم دە مۇمكىن. وسىعان قاتىستى جوعارى لاۋازىمدى تۇلعالاردىڭ نە وزدەرىن نە بالالارىن 2 ايلىق اسكەري دايىندىققا مىندەتتەيتىن نورما قاراستىرۋعا بولا ما؟""، دەدى رينات زايىتوۆ.
دەپۋتاتتىڭ بۇل ساۋالىنا قورعانىس ءمينيسترى رۋسلان جاقسىلىقوۆ جاۋاپ بەردى. ولاردىڭ ايتۋىنشا، بالالارىن اسكەرگە جىبەرگەندەر اراسىندا لاۋازىمدى تۇلعالار بار. الايدا ولار بۇل تۋرالى كوپ ايتا بەرمەيدى.
"باسقالار كورسىن، ءبىلسىن دەپ پاتريوت بولۋدىڭ قاجەتى جوق. مەن ءبىر مىسال ايتايىن. بۇرىنعى ىشكى ىستەر ءمينيسترى گەنەرال پالكوۆنيك قالمۇحانبەت قاسىموۆ 2 تۋعان جيەنىن ماعان اكەلىپ، سارباز رەتىندە اسكەري بورىشىن وتەسىن دەدى. سەناتور بولعان قۇل-مۇحاممەد ابرار ۇلىنىڭ دا وتە جاقسى مەكتەپتە ءبىلىم العان ۇلى دەسانتتىق شابۋىل اسكەرىندە سارباز رەتىندە بورىشىن وتەدى. ءقازىر اقش-تاعى اسكەري ۋچيليششەسىندە ءبىلىم الىپ جاتىر. سول سەبەپتى مينيسترلەر مەن دەپۋتاتتاردىڭ بالالارىن ءبولىپ جارىپ، مۇنداي زاڭ شىعارۋدىڭ ماعىناسى جوق. زاڭ بارىنە ورتاق"، دەدى مينيستر.
پىكىر قالدىرۋ