ولاي ەمەس ەكەن مۇلدەم. اتاعى بار، اقشاسى بارلار مەن بيلىكتەگى شەنەۋنىكتەر دە ايەلدەرىن ساباپ، ءولتىرىپ جاتىر. ماسەلەن، «نەمولچي.Kz» قوعامدىق قورى اقشاسى دا، شەنى دە بولعان بۇرىنعى جانە قازىرگى كۇيەۋلەرىنىڭ قولىنان قازا تاپقان ايەلدەردىڭ ءتىزىمىن تەرىپتى. 

سالتانات قۇلجاعاروۆا. استانا قالاسىنداعى بەلدى كاسىپكەردىڭ ايەلى سىمبات قۇلجاعاروۆا 29 جاسىندا 9-10 جەلتوقسانعا قاراعان ءتۇنى بيىكتەن قۇلاپ، قازا بولدى. قىزدىڭ ءمايىتى نۇر-سۇلتانداعى تۇرعىن ءۇي كەشەنىنىڭ بىرىنەن تابىلعان. ول قايتىس بولارىنان بۇرىن 3 اي بويى جەلىدەگى پاراقشاسىنا كۇيەۋى بالالارىن تارتىپ الۋ ءۇشىن كۇشتەپ پسيحياتريالىق اۋرۋحاناعا جاتقىزعانىن جازىپ، كومەك سۇراپ كەلگەن. ءبىراق وعان كومەكتەسەتىن ەشكىم تابىلماي، ول ءۇيدىڭ تەرەزەسىنەن سەكىرىپ كەتكەن. ونىڭ ولىمىنە كۇيەۋى سەبەپ بولعانى تۋرالى جاڭالىقتاردا تاراعان.

ايناگۇل حايرۋللينا. ورال قالاسىنىڭ ەكس-شەنەۋنىگى باۋىرجان حايرۋللين بۇرىنعى ايەلى ايناگۇل حايرۋللينانى 18 جەردەن پىشاقتاپ، ءولتىرىپ تاستاعان. قانى سورعالاعان ايناگۇل حايرۋللينا پوليسيا كولىگىندە كوز جۇمدى. نەكەدە تۇرعان جىلدارى كۇيەۋى ايناگۇلدى سوققىعا جىعىپ، كۇن كورسەتپەيتىن بولعان دەسەدى. باۋىرجان حايرۋللين 15 جىلعا باس بوستاندىعىنان ايىرىلدى.

اجار شادييەۆا. ونىڭ كۇيەۋى رۋسلان وتاربايەۆ شەنەۋنىك، امانات پارتياسىنىڭ مۇشەسى، ءوزى ايەلدەردى زورلىق-زومبىلىقتان قورعاۋ كوميتەتى باسشىسىنىڭ ۇلى بولا تۇرا، ايەلىن اياۋسىز سوققىعا جىعىپ ولتىرگەن. قايعىلى وقيعاعا 15 پوليسيا قىزمەتكەرى، دوستارى، تۋىستارى كۋا بولعان. بۇل قىلمىسى ءۇشىن رۋسلان وتاربايەۆ 12 جىلعا تۇرمەگە قامالدى.

ايمان اسانوۆا. بىلتىر زاڭگەر ايمان اسانوۆانى بۇرىنعى كۇيەۋى تالعات نۇرتايەۆ 18 جەرىنەن پىشاقتاپ ولتىرگەن. الايدا الماتى قالاسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىنىڭ سۋدياسى ەركىن مايشينوۆتىڭ توراعالىعىمەن قازا تاپقان ادامنىڭ بۇرىنعى كۇيەۋى تالعات نۇرتايەۆ ەڭ تومەنگى قاۋىپسىزدىك قىلمىستىق - اتقارۋ جۇيەسى مەكەمەسىندە 1،5 جىلعا عانا باس بوستاندىعىنان ايىرۋ جازاسىنا كەسىلگەن.

ەڭ تومەنگى قاۋىپسىزدىك قىلمىستىق - اتقارۋ جۇيەسى مەكەمەسىندە 1،5 جىلعا عانا باس بوستاندىعىنان ايىرۋ جازاسىنا كەسىلگەن

سالتانات نۇكەنوۆانى ەكس-مينيستر قۋاندىق بيشىمبايەۆ استاناداعى ءوزىنىڭ «Bau» مەيرامحاناسىندا سوققىعا جىعىپ، ءولتىرىپ قويدى. مارقۇمنىڭ تۋىستارى بۇعان دەيىن دە بيشىمبايەۆتىڭ ايەلىنە بىرنەشە رەت قول كوتەرگەنىن ايتادى.

ەلىمىزدە ءبىر كەزدەرى بەتكەۇستار شەنەۋنىكتەرىمىزدىڭ ءبىرى بولعان بيشىمبايەۆ ايەلىن ءولتىرىپ جاتسا، تاعى تالايى ايەلىنەن بالالارىن تارتىپ الىپ، كۇن كورسەتپەي ءجۇر. توقايەۆتىڭ كەڭەسشىسى بولعان، ەكى بەتى تومپيعان ولجاس قۇدايبەرگەنوۆ دەيتىن ەكونوميست بار. جۇرتتىڭ الدىنا شىعىپ الىپ، اقىل سوققاندا الدىنا جان سالمايدى. سويتسەك، ول ۇيىندە ايەلى ءمولدىر قابىلوۆانىڭ قانىن قاسىقتاپ ىشەتىن ەسۋاستىڭ ءوزى ەكەن. بەيشارا ايەلى كۇيەۋىنەن ءزابىر كورگەنىن ايتىپ، قاسىم-جومارت توقايەۆتان كومەك سۇراۋعا ءماجبۇر بولدى. ونىڭ ايتۋىنشا، كۇيەۋى وعان جانە بالالارىنا زورلىق-زومبىلىق كورەسەتىپ كەلگەن. توقايەۆتىڭ كەڭەسشىسى بولىپ، ايدارىنان جەل ەسكەن ولجەكەڭ ايەلگە اراشا ءتۇسىپ، كومەكتەسپەك بولعان اكەسى مەن اعاسىن دا سوتتاتىپ جىبەرگەن دەسەدى.

از دەسەڭىز، ءانشى التىناي جورابايەۆا دا بۇرىنعى كۇيەۋى ءسابيت ءابدىحالىقوۆتان ابدەن ءجابىر كورىپ، 4 قىزىن الىپ، استاناعا باس ساۋعالاپ قاشىپ كەتكەن.

جوعارىدا تىزىلگەندەر – كىلەڭ شەنەۋنىكتەر، ەل الدىندا جۇرگەن اپتال ازاماتتار. ولار سويتسە، تۇرمىسىن تۇزەي الماي، قيىنشىلىقتان كوزىن اشپايتىن قاراپايىم حالىقتان نە سۇرايمىز؟!