كەمەروۆو وبلىسىنىڭ بۇرىنعى گۋبەرناتورى امان تولەيەۆ 79 جاسىنا قاراعان شاعىندا  دۇنيەدەن وزدى. ساياساتكەردىڭ ومىردەن وزعانى تۋرالى اقپاراتتى قازىرگى ايماق باسشىسى سەرگەي سيۆيليەۆ ۆكونتاكتە جەلىسىندەگى رەسمي پاراقشاسىندا حابارلادى.

"1997 جىلدان 2018 جىلعا دەيىن كەمەروۆو وبلىسىنىڭ گۋبەرناتورى بولعان امان گۋمير ۇلى تولەيەۆ ومىردەن ءوتتى. ول – بۇكىل ءومىرىن كۋزباسس پەن رەسەيگە قىزمەت ەتۋگە ارناعان جارقىن، ەرەكشە تۇلعا. بۇل – ورنى تولماس قازا. وڭىرىمىزدەگى كەي وقيعالار امان گۋميرۇلىمەن بايلانىستى: كەنشىلەر ءترانسسىبىر تەمىر جولىنداعى قوزعالىستى بوگەگەن قيىن-قىستاۋ كەزەڭدەردە ايماقتى باسقارىپ، داعدارىستان شىعارا ءبىلدى"، – دەپ جازدى گۋبەرناتور.

بۇعان دەيىن امان تولەيەۆ 2018 جىلعى ءساۋىر ايىندا 60 ادام، كوبىسى بالالار قازا تاپقان "زيمنيايا ۆيشنيا" ورتىنە بايلانىستى ميتينگىدەن كەيىن اكىم قىزمەتىنەن كەتكەن بولاتىن.

سول جىلى تولەيەۆ ءوزىنىڭ ساياسي مانسابىن اياقتاعانىن حابارلاعان ەدى. سونىمەن قاتار امان تولەيەۆ پرەزيدەنتتىك سايلاۋعا ءۇش رەت: 1991، 1996 جانە 2000 جىلدارى ۇمىتكەر رەتىندە قاتىستى. تاسس اگەنتتىگىنىڭ مالىمەتىنشە، امان تولەيەۆ 1944 جىلى 13 مامىردا تۇرىكمەن كسر-دە دۇنيەگە كەلگەن. اكەسى قازاق. اناسى جاعىنان تاتار، باشقۇرت قانى بار. ونىڭ ەسىمى امانگەلدى يمانوۆتىڭ قۇرمەتىنە قويىلعان. اكەسى مولداعازى قولدىباي ۇلى تولەيەۆ مايداندا قازا تاپقان.