رەسمي مالىمەتتەر بويىنشا جىل باسىنان بەرى ادام ساۋداسىنا قاتىستى 124 قىلمىس تىركەلدى. اتاپ ايتقاندا:
- ادام ساۋداسى – 27 (سونىڭ ىشىندە كامەلەت جاسقا تولماعاندارعا قاتىسى 22 قىلمىس)؛
- جەزوكشەلىكپەن اينالىسۋعا تارتۋ – 10 (سونىڭ ىشىندە كامەلەت جاسقا تولماعاندارعا قاتىسى 5 قىلمىس)؛
- ادام اعزالارىن ساتۋ – 4؛
- قاناۋ ماقساتىندا باس بوستاندىعىنان زاڭسىز ايىرۋ – 4؛
- پريتونداردى ۇستاۋ، جەڭگەتايلىق – 79؛
ۇيىمداسقان قىلمىسقا قارسى كۇرەس دەپارتامەنتىنىڭ باستىعى قانات نۇرماعامبەتوۆتىڭ ايتۋىنشا، جاقىندا كەزەكتى رەت "STOP ترافيك" جەدەل شاراسى وتكەن. ناتيجەسىندە 39 قىلمىس انىقتالدى. ەكى كەلىنشەك تۋعان بالاسىن ساتقىسى كەلگەن. ادام ساتۋ فاكتىسى الماتى وبلىسى مەن شىمكەنت قالاسىنان انىقتالدى.
وبلىستىڭ 24 جاستاعى تۇرعىنى جۇكتىلىكتىڭ جەتىنشى ايىندا الەۋمەتتىك جەلىدە بالانى ساتۋ تۋرالى حابارلاندىرۋ جاريالاپ، ساتىپ الۋشىلاردى ىزدەۋمەن اينالىسقان. سوڭىندا ول بالالارى جوق ەرلى-زايىپتىلاردى تاۋىپ، ولارمەن كەلىسىم جاساعان. ساتىپ الۋشى تاراپ ايەلدىڭ نەسيەلىك قارىزدارىن وتەپ بەرمەك بولعان. بۇل فاكت “كامەلەتكە تولماعاندار ساۋداسى” بابى بويىنشا تىركەلدى، سوتقا دەيىنگى تەرگەۋ باستالدى. كۇدىكتى قاماۋعا الىندى.
شىمكەنتتە جاڭا تۋعان نارەستەنى ساۋدالاۋدىڭ تاعى ءبىر فاكتىسى تىركەلدى.
– ۇيىمداسقان قىلمىسقا قارسى كۇرەس باسقارماسىنىڭ قىزمەتكەرلەرى 23 جاستاعى جاس ايەلدىڭ ءوز بالاسىن ساتپاق بولىپ، ساتىپ الۋشىلاردى ىزدەۋمەن اينالىسقانىن انىقتادى. ول دەلدال ارقىلى باسقا وبلىستىڭ 45 جاستاعى تۇرعىنىن تاپقان. فاكت قىلمىستىق كودەكستىڭ 135-بابى بويىنشا تىركەلدى، سوتقا دەيىنگى تەرگەۋ باستالدى. بالا سابيلەر ۇيىنە ورنالاستىرىلدى. كۇدىكتى قاماۋعا الىندى، – دەدى ق ر ءىىم ۇيىمداسقان قىلمىسقا قارسى كۇرەس دەپارتامەنتىنىڭ باستىعى قانات نۇرماعامبەتوۆ.
ال ورال قالاسىندا 35 جاستاعى ايەل ءۇش اي بويى كامەلەت جاسقا تولماعان قىزدى جەزوكشەلىكپەن اينالىسۋعا ماجبۇرلەگەن. بارلىق اقشانى ءوز قالتاسىنا باسقان. قازىرگى كەزدە قىلمىستىق ءىس قوزعالدى. 17 جاستاعى قىز تۋعان-تۋىستارىنا تاپسىرىلدى.
پىكىر قالدىرۋ