قازاقستاندا كينو يندۋسترياسى دامىپ كەلەدى. ءبىراق پروكاتقا شىعىپ جاتقان وتاندىق كينولاردىڭ دەنى كومەديا جانرىنداعى فيلمدەر. ۇلتتىق سيپاتتاعى تولىقمەتراجدى كينولاردى بىلاي قويعاندا، كورەرمەنگە وي سالارلىق درامالار تۇسىرۋگە دە بولار ەدى. ءبىراق حالىق قاراجاتىنا كينو تۇسىرەتىن «قازاقفيلم» تۋىندىلارىنىڭ ىشىندە بەلگىلى تۇلعالار جايىندا تۇسىرگەن فيلمدەرى بولماسا، باسىم كوپشىلىگى مينيستر تىزىمىندە بار دا، ەلدىڭ اۋزىندا جوق.

كينوتەاترلارداعى قازاق كينوسىنىڭ ءبارى دەرلىك كومەديا. كومەديا ارقىلى قازاق ءتىلدى كورەرمەن جيناي الاتىنىن دالەلدەدى. ءقازىر گولليۆۋد فيلمدەرىن دە قازاقشا دىبىستاۋ ءۇردىسى ەندى. جەتىستىكتەرىن جوققا شىعارۋعا بولمايدى. وسىدان ون جىل بۇرىن كينوتەاترلاردا تەك ورىسشا فيلمدەر قويىلاتىن. سەبەبى كومپانيا يەلەرىنىڭ ءبارى ءورىستىلدى، كينونى الىپ كەلەتىن ديستريبيۋتورلاردىڭ ءبىرى ۋكراينادا، ءبىرى رەسەيدە ەدى. ولاردىڭ ساپاسى كوڭىل كونشىتپەيتىن. كەي سيۋجەتتەرى قازاق ءۇشىن تىم ەرسى، كەيدە ءتىپتى انايى. ال قازاق ءوز مەنتاليتەتىنە ساي دۇنيە تۇسىرەدى. دەي تۇرعانمەن، مادەني ءبىتىم بولمىستى ەمەس، قايماعى سۇزىلگەن كوك ءسۇتىن دە ەش ىركىلمەي «مىنەزىڭ وسى» دەپ بەتىنە باسقان قۇنى ارزان فيلمدەر جەتەرلىك. 

كومەديانىڭ تابىسى مەن شىعىنى پروكاتقا بايلانىستى. فيلم ءوتىمدى بولسا دا، ءساتسىز شىقسا دا قاراجات تەك تۇسىرگەن تاراپتىڭ قالتاسىنان شىعادى. دەمەك، باعاسىن بەرەتىن حالىق. ۋاقىت تا ىرىكتەپ، سۇزگىدەن وتكىزىپ جاتىر. ماسەلەن، وتكەن جىلدارى انشىلەردىڭ كينو ءتۇسىرۋى بەلەڭ العان، ءقازىر دە كومەديالىق فيلمدەرگە ءتۇسىپ، ەلگە تانىلعان اكتەرلەردىڭ ءارقايسىسى ءوز تۋىندىلارىن شىعارىپ، ب ا ق سىناسىپ جاتىر. ءفيلمنىڭ ەكىنشى ءبولىمىنىڭ شىعۋى، ارينە، العاشقىسىنىڭ وتىمدىلىگىنە بايلانىستى.

2023 جىلى پروكاتقا شىققان كومەديالاردىڭ ىشىندە ەڭ كوپ قاراجات جيناعان فيلمدەر:

 – «ماعان نازار اۋدار» 818 ملن 844 مىڭ تەڭگە

–  «حوتيا بى كينودا 2» 985 ملن 085 مىڭ تەڭگە

–  «بيزنەس پو-كازاحسكيي ۆ ينديي» 1 ملرد 281 ملن 598 مىڭ تەڭگە

ەڭ تابىستى كومەديانىڭ پروديۋسسەرى نۇرلان قويانبايەۆتان بۇگىنگى كومەديالىق سيپاتتاعى كينولارعا قاتىستى پىكىرىن سۇرادىق:

– الەمدە ون-شاقتى مەملەكەت قانا ءوز كينولارىن ءوز كينوتەاترىنان كورەدى، ول كينويندۋسترياسى دامىعان اقش، فرانسيا، تۇركيا، كورەيا، ينديا، انگليا. قالعان مەملەكەتتەردە ەكراندى گولليۆۋد كينولارى باسىپ العان. ءبىزدىڭ ەلدە 30 جىلداي گولليۆۋد كينولارى باسىم بولدى.

4-5 جىل بۇرىن قازاق كومەدياسى گولليۆۋد كينولارىمەن كۇرەستى باستاپ كەتتى. كينوتەاترلار قازاق كومەدياسىنىڭ كورەرمەنى بار ەكەنىن ءتۇسىنىپ، قازاق كينوسىنا كوپ سەانس بەرە باستادى. بۇگىن كينوتەاترلاردا قازاق كينوسىن كورسەتۋ ءداۋىرى باستالدى. بۇل تاريحىمىزدا بولماعان ۇلكەن جەڭىس! بۇرىن كورەرمەننىڭ  كينوعا بارىپ بيلەتكە جاراتقان اقشاسى تىكەلەي شەت ەلگە، مىسالعا، گولليۆۋدقا كەتەتىن، ول شامامەن  جىلىنا 200 ملن دوللار. قازاق كومەديالارىنىڭ ارقاسىندا ءقازىر جىلىنا  بيلەتكە جاراتاتىن اقشانىڭ تەڭ جارتىسى، ياعني 100 ملن دوللار ءوز ەلىمىزدە قالىپ جاتىر.

ارينە، ۇلكەن قادام باستاپ كەلە جاتقان كومەديا جانرىنداعى كينولاردىڭ اراسىندا  كوپتىڭ كوڭىلىنەن شىقپاي جاتقاندارى دا بار. كوش جۇرە تۇزەلەدى. بارلىعى كومەديا ءتۇسىرىپ كەتتى دەگەن وي قالىپتاستى. جاستارعا تاريحىمىز تۋرالى، موتيۆاسيا بەرەتىن كينولار قاجەت! كومەديا ارى قاراي دامي بەرەتىنى انىق. ال دراما كينولارى ءوز كۇرەسىن قاشان باستايدى؟ حالىقتىڭ اقشاسىنا كينو ءتۇسىرىپ جاتقان ماماندار، كەزەك سىزدەردە! تەك كومەديا كورە بەرەمىز بە، دەيدى ول.

ال دراما ءتۇسىرۋ جوسپارىڭىزدا بار ما دەگەن سۇراققا بىلاي جاۋاپ بەردى:

– 15 جىل كۆن-دا وينادىم. كومەديانىڭ جاقسى دامىپ كەتۋىنىڭ نەگىزگى سەبەبى – كۆن، جايدارمان ويىندارىنىڭ دامىپ، شەتەلگە دەيىن جەتۋى. سىرت ەل قازاقتىڭ كينو، سەريالدارىن كورىپ، ماقتاۋ ايتىپ جاتادى، ال ءوز ەلىمىزدە ۇلكەن اعالارىمىزدان تەك سىن ەستيمىز. مەن ءازىلدىڭ ادامىمىن. مەنىڭ باعىتىم سول. دراما ءبىزدىڭ كەسىرىمىزدەن جوق بولىپ كەتپەدى. كينو سالاسىندا ءبىلىم الىپ، وقىعان اعا-ىنىلەرىمىزدىڭ مىندەتى بۇل. سولار ءۇنسىز جاتقان سوڭ، تەك كومەديا كورسەتىلۋدە.