ەلىمىزدەگى شەكاراداعى كولىكتەردىڭ كەپتەلىسى تۋرالى ماسەلە ماجىلىستە كوتەرىلدى. بۇل تۋرالى دەپۋتات ماقسات تولىقباي ايتتى.
"شەكارا پۋنكتەرىن وتكىزۋ قابىلەتىن ارتتىرۋ شارالار قابىلداپ جاتىرمىز، دامىتىپ جاتىرمىز دەيمىز. ءبىراق قىرعىزستانمەن شكاراعا بارا قالساڭ ۇنەمى ۇزىن-سونار كەزەك، جۇك كولىكتەرىنىڭ كەپتەلىسى بالەنباي شاقىرىمعا سوزىلىپ جاتادى. قازان ايىندا اقپارات قۇرالدارى 600-گە جۋىق كولىكتىڭ اپتالاپ كەزەكتە تۇرعانىن جازدى. كەيبىر تاۋارلاردىڭ مەرزىمى ءوتىپ كەتىپ جاتتى. بۇل تەك قىرعىزستانمەن شەكاراداعى جاعداي ەمەس. رەسەي شەكاراسىنا بارساڭ دا ۇنەمى وسىنداي ايعاي-شۋ بولىپ جاتادى. جالپى وسى پروبلەمانى قالاي شەشەمىز؟ وسىعان باس اۋىرتىپ جاتقان ادام بار ما؟"، دەدى ماقسات تولىقباي.
ماقسات تولىقبايدىڭ بۇل ساۋالىنا قارجى ءمينيسترى جاۋاپ بەردى. ول شەكارا بەكەتتەرىندەگى كەپتەلىس پەن كەزەكتى بولدىرماۋ ءۇشىن كەرەكتى شارالار قولدانىلىپ جاتىرعانىن، بۇل جۇمىستاردىڭ 2025 جىلى اياقتالاتىنىن ايتقان بولاتىن.
"باس اۋىرتىپ جاتقان مەملەكەتتىك ورگاندار بار. نەگىزگى دەگەن 10 سىرتقى بەكەتتەر بويىنشا تولىق مودەرنيزاسيا جۇرگىزىلىپ جاتىر. رەسەي جانە قىرعىزستان ەلدەرىمەن شەكارا بەكەتتەرىندە كولىك كەپتەلىسى بولىپ جاتاتىنى راس. الايدا بۇل كولىك مينيسترلىگىنە قاراستى بولعاندىقتان ولاردىڭ ءوز جوسپارلارى بار. ءقازىردىڭ وزىندە كەپتەلىس بولماۋى ءۇشىن كەرەك جۇمىستاردى جۇرگىزىپ جاتىرمىز. تاسىمالداۋشىلاردىڭ الدىن الا كەزەككە تۇرۋىنا دا مۇمكىندىك جاسالعان. ال ءسىز ايتىپ وتىرعان 600 كولىكتىڭ كەپتەلىستە تۇرۋىنا كەلەتىن بولساق، ارنايى وپەراسيا كەزىندە، كونتراباندالىق تاۋارلاردى وتكىزۋ بارىسىندا كەپتەلىس ورىن الىپ تۇراتىنىن مويىندايمىز"، دەدى قارجى ءمينيسترى ەرۇلان جاماۋبايەۆ.
پىكىر قالدىرۋ