ءماجىلىس دەپۋتاتى رينات زايىتوۆ قازاقستاندىقتاردان پوليسيا قىزمەتىنە كوپ شاعىم تۇسەتىنىن ايتتى.
«بىلە بىلسەڭىزدەر، قازاقستان رەسپۋبليكاسى ءوز بيلىگىن كۇش قۇرىلىمدارىنا پارمەندى ەسىرسىن دەپ ەمەس، ەسكەرسىن دەپ بەرەدى. حالىقتى قورلاسىن دەپ ەمەس، قورعاسىن دەپ بەرەدى؟! سوندىقتان، بۇگىنگى شۇعىل ساۋال جولداۋىمىزدىڭ سەبەبى –قاراپايىم حالىقتىڭ ءۇنىن، مۇڭ-مۇقتاجىن، تالاپ-ارىزىن سىزدەرگە جەتكىزۋدىڭ سوڭعى امالى دەسەك تە بولاتىن شىعار. ويتكەنى، شاراسىز حالىق بىزدەر – دەپۋتاتتارعا سوڭعى ينستاسيا رەتىندە، باسقا ورگانداردان كومەك كۇتە الماعان سوڭ عانا جۇگىنەدى»، - دەيدى ول باس پروكۋرورعا جولداعان ساۋالىندا.
رينات زايىتوۆ دەپۋتاتتاردىڭ اتىنا وڭىرلەردەگى كۇش قۇرىلىمدارى قىزمەتكەرلەرىنىڭ ارەكەتىنە شاعىم ءجيى تۇسەتىنىن جەتكىزدى.
«ولارعا الماتى، شىمكەنت، وسكەمەن، سەمەي، جاڭاوزەن جانە تاعى باسقا قالالاردان تۇسكەن ءبىرقاتار شاعىمدى جاتقىزا الامىز. وندا اتا زاڭىمىزبەن بەكىتىلگەن، ادام جانە ادامنىڭ ءومىرى، ونىڭ قۇقىعى مەن بوستاندىعىن قورعاۋ سياقتى ايرىقشا قۇقىققا يە – كۇش قۇرىلىمى قىزمەتكەرلەرى وزدەرىنىڭ «جەدەل ىزدەستىرۋ ءىس-شارالارىن» جامىلىپ، جەكە ماقساتتا ارەكەت ەتەتىندەرى مالىمدەلىپ جاتىر»، - دەدى دەپۋتات.
دەپۋتات ايتقان سوزىنە ناقتى مىسالدار كەلتىردى.
«مىسالى، شىمكەنت قالاسىنىڭ تۇرعىنى، جالعىز باستى انا - ا.ا. مامايەۆانىڭ جانە ونىڭ ۇلى الاياققا تاپ بولىپ، شامامامەن 4 ملن تەڭگەدەن ايىرىلعان ەكەن، بۇل فاكتىنى انىقتاپ، شىمكەنت قالاسىنىڭ ەڭبەكشى اۋداندىق پوليسيا باسقارماسىنا ارىزىمەن جۇگىنگەن. الايدا، ءوتىنىش يەسىنىڭ ايتۋىنشا، قۇقىق قورعاۋ ورگاندارى قىزمەتكەرلەرىمەن تانىستىعىنىڭ ارقاسىندا، ايىپتالۋشىنىڭ ۇستىنەن قوزعالعان قىلمىستىق ءىس، بەلگىسىز سەبەپتەرمەن بىرنەشە رەت توقتاتىلعان جانە جابىرلەنۋشى مەن ونىڭ ۇلىنا اشىق تۇردە قوقان-لوقى كورسەتىلگەن. سونىمەن، 2021 جىلدىڭ تامىزىندا قوزعالعان ءىس بۇگىنگى تاڭعا دەيىن سوتقا جەتپەگەن»، - دەيدى ول.
سونداي-اق، قوعامدىق قابىلداۋعا كەلگەن شىعىس قازاقستان وبلىسى وسكەمەن قالاسىنىڭ تۇرعىنى، ءوتىنىش يەسى ز.ا. توتانوۆانىڭ اتىنان ارىز قالدىرىپ، ايتىپ جەتكىزگەن جايت تىپتەن ويعا قونىمسىز دەيدى دەپۋتات. ونىڭ ايتۋىنشا جابىرلەنۋشىنىڭ وزىنە ايماقتىق كۇشتىك قۇرىلىم قىزمەتكەرلەرى تىرىدەي ءمايىت قازدىرىپ، ازاپ كورسەتكەن.
«وسىنداي ءىستى سوتقا دەيىن جەتكىزبەۋ، نە ءتىپتى ءىستى قوزعاماۋ، بيلىگىن اسىرا پايدالانۋ جانە تاعى دا سول سياقتى ىس-ارەكەتتەر تۋرالى مەنىڭ وسىنداعى ارىپتەستەرىم دە ايتا الادى. سونداي-اق، بۇل ىشكى ىستەر مينيسترلىگىندەگى «قۇجاتى بار قاراقشىلار مەن قارۋى بار قورقاۋلار» ءوز قىزمەتتىك مانسابىن اسىرا پايدالانىپ، قىزداردى زورلاۋ فاكتىسىمەن وزدەرى ۇستالىپ وتىر. وسى رەتتە، بۇلارعا سەنىم قايدان بولسىن؟! قۇزىرەتىن قىلمىستى ازايتۋ ءۇشىن ەمەس، تابىسىن كوبەيتۋ ءۇشىن پايدالاناتىن قىزمەتكەرلەرگە نەگە شارا قولدانبايمىز؟» - دەيدى ول.
پىكىر قالدىرۋ