اقتوبە وبلىسىندا وقۋشىلاردى وليمپياداعا اپارعان كولىك جۇرگىزۋشىسى قاماۋعا الىندى. 19 جەلتوقساندا ساعات 8:30 شاماسىندا «قۇرىلىس» اۋىلىنىڭ ماڭىنداعى سامارا-شىمكەنت اۆتوجولىندا جول اپاتى بولدى.
Toyota Alphard اۆتوكولىگى مەن Volvo جۇك كولىگى سوقتىعىسقان. سالدارىنان Toyota Alphard اۆتوكولىگىنىڭ جولاۋشىلارى، ەر ادام (ءمۇعالىم) جانە 2007 جىلى تۋعان ەكى وقۋشى وقيعا ورنىندا قازا تاپتى.
وسى فاكتى بويىنشا سوتقا دەيىنگى تەرگەۋ باستالدى. جول اپاتىنىڭ ءمان-جايى انىقتالىپ جاتىر.
بۇعان دەيىن وقۋ-اعارتۋ مينيسترلىگى بالالاردىڭ قۇقىقتارىن قورعاۋ كوميتەتى اقتوبە وبلىسىندا جول اپاتىنان قازا تاپقانداردىڭ تۋىستارى مەن جاقىندارىنا قايعارىپ كوڭىل ايتتى.
"قازا تاپقانداردىڭ وتباسىلارىنا قاجەتتى قولداۋ، وقۋشىلارعا ءتيىستى پسيحولوگيالىق كومەك كورسەتىلەدى. وقۋ-اعارتۋ مينيسترلىگى ءبىلىم بەرۋ ۇيىمدارىنىڭ باسشىلارىنا قىسقى كەزەڭدە بالالاردى ءقاۋىپسىز تاسىمالداۋدى قامتاماسىز ەتۋ جونىندەگى جۇمىستى كۇشەيتۋ قاجەتتىگىن ەسكە سالادى"، – دەلىنگەن اقپاراتتا.
قاۋىپسىزدىك تەحنيكاسى جانە سانيتارلىق-ەپيدەميولوگيالىق نورمالاردى ساقتاۋ بويىنشا نۇسقاۋلىق ءبىلىم بەرۋ ۇيىمدارىنا جىبەرىلگەن.
پىكىر قالدىرۋ