سەناتتىڭ جالپى وتىرىسىندا «قازاقستاننىڭ كەيبىر زاڭنامالىق اكتىلەرىنە «ازاماتتارعا ارنالعان ۇكىمەت» مەملەكەتتىك كورپوراسياسى، «استانا حاب» حالىقارالىق تەحنولوگيالىق پاركى جانە داكتيلوسكوپيالىق تىركەۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ ەكىنشى وقىلىمدا ماقۇلداندى.
"زاڭمەن ەنگىزىلگەن ماڭىزدى جاڭاشىلدىقتىڭ ءبىرى داكتيلوسكوپيالىق تىركەۋ تۋرالى ەرەجەلەر بولىپ سانالادى. مىسالى، «داكتيلوسكوپيالىق جانە گەنومدىق تىركەۋ تۋرالى» 2016 جىلعى 30 جەلتوقسانداعى زاڭنىڭ 2-تاراۋىندا قازاقستان ازاماتىنىڭ پاسپورتىن نەمەسە جەكە كۋالىگىن الۋ ءۇشىن العاش رەت جۇگىنگەن، سونداي-اق بۇرىن داكتيلوسكوپيالىق تىركەۋدەن وتپەگەن قازاقستان ازاماتتارى ونى قالپىنا كەلتىرگەن، اۋىستىرعان جاعدايلاردا قازاقستان ازاماتتارىن مىندەتتى داكتيلوسكوپيالىق تىركەۋ تۋرالى نورمالار بەلگىلەنگەن بولاتىن.«داكتيلوسكوپيالىق جانە گەنومدىق تىركەۋ تۋرالى» زاڭنىڭ 39-بابىمەن 2-تاراۋدىڭ قولدانىسى 2024 جىلعى 1 قاڭتارعا دەيىن توقتاتىلعان"، - دەپ جازىلعان زاڭنىڭ قورىتىندىسىندا.
زاڭعا سايكەس، ەندى قازاقستاندىقتار ساۋساق ءىزىن تاپسىرۋعا مىندەتتەلمەيدى.
"زاڭدا قازاقستان ازاماتتارىنا قاتىستى جوعارىدا كورسەتىلگەن ەرەجەلەر الىنىپ تاستالادى جانە قازاقستان ازاماتتارى ءۇشىن ولاردىڭ كەلىسىمىمەن عانا ەرىكتى داكتيلوسكوپيالىق تىركەۋ ەنگىزىلەدى. قازاقستان ازاماتى ءۇشىن مىندەتتى داكتيلوسكوپيالىق تىركەۋ تەڭىزشىنىڭ جەكە كۋالىگىن العان جاعدايدا عانا ساقتالادى. «داكتيلوسكوپيالىق جانە گەنومدىق تىركەۋ تۋرالى» زاڭدا بەلگىلەنگەن جاعدايلاردا 16 جاسقا تولعان شەتەلدىكتەر مەن ازاماتتىعى جوق ادامدار ءۇشىن مىندەتتى داكتيلوسكوپيالىق تىركەۋ ەنگىزىلەدى. زاڭعا سايكەس داكتيلوسكوپيالىق تىركەۋگە قاتىستى ەرەجەلەر 2024 جىلعى 1 قاڭتاردان باستاپ قولدانىسقا ەنگىزىلەدى.
شەتەلدىكتەر مەن ازاماتتىعى جوق ادامدار ءۇشىن جەكە سايكەستەندىرۋ ءنومىرىن الۋعا قازاقستان اۋماعىنداعى تىركەۋشى ورگاندارعا جەكە ءوزىنىڭ جۇگىنۋ تالابى ەنگىزىلەدى. بۇرىن ولار مۇنى باسقا ادامدارعا بەرىلگەن سەنىمحات نەگىزىندە ناقتى ورنالاسقان جەرى بويىنشا جاساي الاتىن"، - دەپ جازىلعان زاڭنىڭ قورىتىندىسىندا.
داۋىس بەرۋ ناتيجەسىندە سەنات دەپۋتاتتارى زاڭدى ەكىنشى وقىلىمدا ماقۇلدادى.
پىكىر قالدىرۋ