"بولاشاق" ستيپەندياسى يەگەرلەرىنىڭ جاڭا ءتىزىمى جاريالاندى.

شەتەلدە كادرلار دايارلاۋ جونىندەگى رەسپۋبليكالىق كوميسسيا شەشىمى بويىنشا، 167 قازاقستاندىق حالىقارالىق ستيپەنديا يەگەرى اتاندى. ونىڭ ىشىندە 131 ادام ماگيستراتۋرادا، 4 ادام دوكتورانتۋرادا وقيدى، 32 قازاقستاندىق الەمنىڭ جەتەكشى جوعارى وقۋ ورىندارى مەن وندىرىستىك ورتالىقتارىنا تاعىلىمدامادان وتۋگە جىبەرىلەدى.

بۇل رەتتە ستيپەندياتتاردىڭ باسىم كوپشىلىگى ينجەنەرلىك-تەحنيكالىق بەيىن باعىتتارى بويىنشا دايارلىقتان وتەدى. وقىتۋ 66 ماماندىق بويىنشا جۇرگىزىلەدى.

"ادىلەتتى قازاقستاننىڭ ەكونوميكالىق باعدارى" جولداۋىندا مەملەكەت باسشىسى عىلىمي ىنتىماقتاستىقتى كەڭەيتۋ جانە اگروونەركاسىپتىك كەشەن، گەولوگيالىق بارلاۋ، IT-سەكتور، كرەاتيۆتى يندۋستريا جانە ت. ب. ءۇشىن كادرلار دايارلاۋ جونىندە تاپسىرمالار بەردى. بۇل باعىتتار سۇرانىسقا يە جانە وزەكتى، ءبىز ۇمىتكەرلەر سانىن كوبەيتۋ، شاكىرتاقى الۋ جانە وسى باعىتتار بويىنشا مامانداردى دايىندايتىن جوو ىزدەۋ جۇمىستارىن جۇرگىزدىك"، - دەدى "حالىقارالىق باعدارلامالار ورتالىعى" اق باسقارما ءتورايىمى ءاليا وسپانوۆا.

ۇمىتكەرلەر University of Aberdeen، University of Illinois at Urbana-Champaign، Australian National University، University of Oxford سياقتى الەمدىك رەيتينگتەر قاتارىنا كىرەتىن جوعارى وقۋ ورىندارىنا ءتۇستى. "اقپاراتتىق تەحنولوگيالار جانە جۇيەلەر"، "ۇلكەن دەرەكتەردى تالداۋ"، "قۇرىلىس ينجەنەرياسى" جانە "گەولوگيا. تاۋ-كەن ءىسى. گەودەزيا" سياقتى ماماندىقتار ۇمىتكەرلەردىڭ ۇلكەن قىزىعۋشىلىعىن تۋدىرادى.

سونداي-اق، شەتەلدە كادرلار دايارلاۋ جونىندەگى رەسپۋبليكالىق كوميسسيانىڭ شەشىمىمەن 481 قازاقستاندىق الەمنىڭ جەتەكشى عىلىمي ورتالىقتارىندا عىلىمي تاعىلىمدامادان ءوتۋ ءۇشىن گرانت يەگەرى اتاندى. ستيپەندياتتار 9 باعىت بويىنشا زەرتتەۋلەر جۇرگىزەدى: ينجەنەرلىك عىلىمدار، جاراتىلىستانۋ عىلىمدارى، گۋمانيتارلىق سالا، اگروونەركاسىپتىك كەشەن، اقپاراتتىق-كوممۋنيكاسيالىق تەحنولوگيالار، الەۋمەتتىك عىلىمدار، ءبىلىم، مەديسينا، ونەر.

ءتىزىمدى مىنا سىلتەمە ارقىلى كورە الاسىزدار.