الەمگە تانىمال گولليۆۋد اكتەرى لەوناردو دي كاپريو قازاقستان بيلىگىن كيىك سانىنىڭ كوبەيۋىمەن قۇتتىقتادى. بۇل تۋرالى اكتەر ءوزىنىڭ Instagram پاراقشاسىندا جازدى. 

"بۇرىن-سوڭدى بولماعان مۇنداي قالپىنا كەلتىرۋ قازاقستاندا كيىك پوپۋلياسياسىنىڭ كەرەمەت ساقتالعانىن كورسەتەدى. 2005 جىلى نەبارى 48 مىڭ باس بولسا، ءقازىر 1،9 ميلليونعا دەيىن جەتتى. براكونەرلىككە قارسى كۇرەس باستامالارىنا، قۇقىقتىق ءتارتىپتى بەلسەندى قامتاماسىز ەتۋگە جانە جاڭا قورعالاتىن اۋماقتاردى قۇرۋعا قوماقتى قاراجات سالعان قازاقستان ۇكىمەتىن قۇتتىقتايمىز. ولاردىڭ تابيعاتتى قورعاۋ ۇيىمدارىمەن، ۋنيۆەرسيتەتتەرمەن جانە عالىمدارمەن ىنتىماقتاستىعى – بىرلەسكەن كۇش-جىگەرمەن قول جەتكىزىلگەن تابيعاتتى قورعاۋداعى شىنايى تابىستىڭ جارقىن مىسالى"، دەپ جازدى لەوناردو دي كاپريو. 

الايدا اكتەر بيىلدان باستاپ ۇكىمەتتىڭ ەلدەگى كيىكتەردى اتۋعا رەسمي تۇردە رۇقسات ەتكەنىن ەستىمەگەن سەكىلدى. ەكولوگيا جانە تابيعي رەسۋرستار ءمينيسترى ەرلان نىسانبايەۆتىڭ بۇل شەشىمى حالىقتىڭ نارازىلىعىن تۋدىرعان بولاتىن. 

كيەلى جانۋاردى اتۋعا رۇقسات بەرگەن مينيسترلىك مۇنى كيىكتىڭ سانى ءوسىپ، تاريحتا بولماعان مولشەرگە جەتكەنىمەن بايلانىستىرادى. سوڭعى ساناق بويىنشا اقبوكەندەردىڭ سانى 2 ميلليونعا دەيىن جەتكەن. سوندىقتان 337 مىڭ كيىكتى قىسقارتۋ كەرەك. ويتكەنى مينيسترلىك كيىكتەن كەلگەن زالال 8 ميلليارد تەڭگەگە جۋىقتاعانىن ايتىپ وتىر. بيىل اقبوكەندەر 1 ميلليون 284 مىڭ گەكتار جايىلىم-شابىندىقتى تاپتاپ، 5 مىڭ گەكتار ەگىندى وتاپ كەتىپتى.