الماتى وبلىسىندا پروكۋراتۋرا سالاسىنىڭ ساڭلاعى - وتەگەن سەيىتءوۆتىڭ 100 جىلدىق مەرەيتويى اياسىندا ارنايى سىنىپ اشىلدى.
بۇل سىنىپ - ءوءزى وتسە دە ارتىندا ولمەس ءسوزى، ەرەن ەڭبەگى قالعان تۇلعالاردى بۇگىنگى ۇرپاققا تاربيە كوزى رەتىندە كورسەتۋ، ەسىمى اڭىزعا اينالعان ادىلەت كەڭەسشىسىنىڭ جارقىن جانە قايتالانباس تۇلعاسىن بولاشاق ۇرپاققا دارىپتەۋ ماقساتىندا اشىلعان. الماتى وبلىسى، ۇيعىر اۋدانى شونجى اۋىلىنداعى №1 مەكتەپ-ليسەيىندە «وتەگەن سەيىت ۇلى اتىنداعى سىنىپتىڭ» اشىلۋ سالتاناتىنا الماتى وبلىسى پروكۋرورىنىڭ ورىنباسارى كۇرەنكەي ازامات جولداسبەك ۇلى، ۇيعىر اۋدانىنىڭ اكىمى بوتا سەرىك قىزى ەلەۋسىزوۆا، الماتى وبلىسى ءبىلىم باسقارماسىنىڭ باسشىسى سالتانات داۋىسپەك قىزى بەسپايەۆا، اۋدان پروكۋرورى كيبرايەۆ باۋىرجان ماراتبەك ۇلى جانە اۋداندىق مەكەمە باسشىلارى، اۋداننىڭ قۇرمەتتى ازاماتتارى، ءماسليحات دەپۋتاتتارى، اقساقالدار، قوعام بەلسەندىلەرى مەن ارداگەر ۇستازدار قاتىستى.
ايتا كەتۋ كەرەك، بيىلعى جىلى پروكۋراتۋرا سالاسىندا ۇلاعاتتى ەڭبەگىمەن ەل ەسىندە قالعان تۇلعالاردىڭ ءبىرى – سەيىتوۆ وتەگەن سەيىت ۇلىنىڭ 100 جىلدىق مەرەيتويى رەسپۋبليكا دەڭگەيىندە اتاپ وتىلۋدە. وسى ورايدى، قازاقستان رەسپۋبليكاسىنىڭ باس پروكۋراتۋراسى بيىلعى جىلدى پروكۋراتۋرا ورگاندارى ءۇشىن «سەيىتوۆ جىلى» دەپ جاريالاعان بولاتىن. ءومىربايانىنا كوز جۇگىرتسەك، ۇلى وتان سوعىسىنا قاتىسىپ، ول جەردە بىرنەشە رەت جارالانسا دا، قان مايداننان امان كەلگەن اردا ازامات سوعىستىڭ سوڭعى كۇنىنە دەيىن مايداننىڭ العى شەبىندە بولعان ەكەن. سەيىتوۆ وتەگەن سەيىت ۇلى 1923 جىلى اقتوبە وبلىسى شالقار اۋدانىنىڭ اقتوعاي اۋىلىندا دۇنيەگە كەلگەن. ون سەگىز جاسىندا ۇلى وتان سوعىسىنا اتتانىپ، بىرنەشە رەت جارالانعانى، الايدا مايدانعا قايتا ورالىپ، سوعىستىڭ سوڭعى كۇنىنە دەيىن مايداننىڭ العى شەبىندە بولعانى تاريح بەتتەرىندە دە جازىلىپ تۇر. سوعىس اياقتالعاننان كەيىن ءوتەگەن سەيىتوۆ بۇكىل سانالى عۇمىرىن پروكۋراتۋرا ورگاندارىنا ارناعان، پروكۋراتۋرا ورگاندارىنىڭ قىزمەتىن جەتىلدىرۋگە، زاڭدىلىق پەن قۇقىق ءتارتىبىن نىعايتۋعا ۇلكەن ۇلەس قوسقان.وڭتۇستىك قازاقستان وبلىسىنداعى كەلەس، سارىاعاش اۋداندارىندا پروكۋراتۋرا تەرگەۋشىسى، وڭتۇستىك قازاقستان وبلىستىق پروكۋراتۋراسىنىڭ اعا تەرگەۋشىسى، قازاق كسر پروكۋراتۋراسىنىڭ ءبولىم پروكۋرورى، الماتى قالاسىنداعى سوۆەت اۋدانىنىڭ پروكۋرورى، الماتى وبلىسىنىڭ پروكۋرورى سىندى قاداعالاۋشى ورگاننىڭ باسشىلىق قىزمەتتەرىندە دە بىرنەشە جىل قىزمەت اتقارعان. ءتىپتى، وتەگەن سەيىتوۆ زەينەت دەمالىسىنا شىققاننان كەيىن دەرەسپۋبليكا جوعارعى كەڭەسىنىڭ ءتورالقاسىندا، مۇگەدەكتەر قوعامىندا، ارداگەرلەر كەڭەسىندە جۇمىسىن ودان ءارى جالعاستىرعان ەكەن.
وسىنداي ءوز ىسىنە ادال، پروكۋراتۋرا سالاسىنىڭ ساڭلاعى وتەگەن سەيىتوۆتىڭ تۋعانىنا 100 جىل تولۋ مەرەيتويى اياسىندا ءوزى قىزمەت اتقارعان الماتى وبلىسىندا سىنىپ قانا ەمەس، اۋدان مەكتەپتەرىنىڭ 100 وقۋشىسى «پروكۋروردىڭ جاس كومەكشىسى» كلۋبىنا سالتاناتتى قابىلداندى.
«ابىرويلى قىزمەت-ونەگەلى ءومىر» تاقىرىبىنداعى وتكەن سالتاناتتى شارا اياسىندا وسىلاي پروكۋرورلىق سالاداعى ەڭبەك تاجىريبەسى جازىلعان ءومىربايان پاراعىندا «الماتى وبلىسىنىڭ پروكۋرورى» قىزمەتىن ابىرويلى اتقارعانى جازىلعان تۇلعاعا – ءوزى قىزمەت ەتكەن ءوڭىردىڭ جاس ورەندەرى دە قۇرمەت كورسەتۋدە. ەندى بولاشاق زاڭ ماماندارى – مەكتەپ قابىرعاسىندا ءجۇرىپ، پروكۋرورلىق قىزمەتتىڭ قىر-سىرىن مەڭگەرىپ، بالا كۇندەرىنەن زاڭسىزدىققا قارسى تۇرۋدىڭ جولدارىن يگەرمەك.
«عۇمىرىنىڭ 43 جىلىن زاڭ سالاسىنا ارناعان اردا ازامات وتەگەن سەيىت ۇلىنىڭ ەل الدىنداعى ەڭبەگىن ۇمىتپاي، ءادىلەت كەڭەسشىسىنىڭ جارقىن بەينەسىن بۇگىنگى ۇرپاققا دارىپتەپ، پروكۋراتۋرا قىزمەتكەرلەرىنىڭ مارتەبەسىن ارتتىرۋ ارقىلى جاس ۇرپاققا كاسىبي باعدار بەرۋءدى ماقسات تۇتتىق» - دەيدى شارا ۇيىمداستىرۋشىلارى.
پىكىر قالدىرۋ