قاسىم-جومارت توقايەۆ الەۋمەتتىك جەلىدە تاراعان "2026 جىلى تاعى دا سايلاۋعا قاتىسادى" دەگەن اقپاراتتى جوققا شىعاردى. پرەزيدەنتتىڭ ايتۋىنشا، بۇدان كەيىن زاڭعا وڭدى-سولدى وزگەرىس ەنگىزىلمەيدى.
"وسىنداي ماڭىزدى ماسەلەگە كەلگەندە، ءتىپتى مۇمكىن ەمەس. مەن بۇعان نىق سەنىمدىمىن. كونستيتۋسيالىق رەفورما اتا زاڭعا قالاي بولسا سولاي وزگەرىس ەنگىزە بەرۋ ءۇشىن جاسالعان جوق.
پرەزيدەنت لاۋازىمىنا ءبىر-اق رەت سايلانۋ تۋرالى ەرەجە ەندى ەشقاشان وزگەرمەيدى. بۇل تالاپ مەملەكەتىمىزدىڭ تاۋەلسىزدىگى، ءبىرتۇتاستىعى، اۋماقتىق تۇتاستىعى جانە باسقارۋ نىسانى تۋرالى نورمالار سياقتى مىزعىماستاي ەتىپ بەكىتىلگەن"، دەپ جاۋاپ بەردى پرەزيدەنت.
توقايەۆ جەتىجىلدىق مەرزىم تۋرالى يدەيانى 15 جىل بۇرىن دا ءتۇرلى جابىق پىكىرتالاستاردا ايتىپ جۇرگەنىن ەسكە الدى.
"سول كەزدە ۇسىنىس اسا قولداۋ تابا قويمادى. ءوزىم پرەزيدەنت بولىپ سايلانعاننان كەيىن، وسى باستامامنىڭ ارتىقشىلىعى مەن كەمشىلىگىن ابدەن سالماقتاپ، ونى قالاي جۇزەگە اسىرۋعا بولاتىنى جونىندە كوپ ويلادىم.
سۋپەرپرەزيدەنتكە ءتان وكىلەتتىكتەردى جويۋ ءۇشىن 2022 جىلى كونستيتۋسياعا ءبىرقاتار ماڭىزدى وزگەرىس ەنگىزىلدى. مەن سول كەزدە جەتىجىلدىق ءبىر مەرزىم يدەياسىن قايتا ۇسىندىم. باستاماما بۇكىل حالىق قولداۋ ءبىلدىردى. وسىمەن بۇل اڭگىمە ءتامام"، دەدى قاسىم-جومارتتوقايەۆ.
پىكىر قالدىرۋ