ساياسي قۋدالاۋ بار دەپ ايتۋ ءۇشىن سەنزۋرا، ارناۋلى زاڭدار مەن جازالاۋشى ورگاندار بولۋى كەرەك. قازىرگى قازاقستاندا مۇنىڭ ەشقايسىسى جوق. بۇل تۋرالى قاسىم-جومارت توقايەۆ "ەگەمەن قازاقستان" گازەتىنە بەرگەن سۇحباتىندا ايتتى.
"ءبىزدىڭ زاڭنامامىزدا ازاماتتاردى ساياسي كوزقاراسى ءۇشىن قۋدالاۋعا نەگىز بولاتىن بىردە-بىر جارلىق، بىردە-بىر زاڭ، بىردە-بىر نورماتيۆتىك قۇجات جوق.
كەرىسىنشە، رەفورمالاردىڭ ناتيجەسىندە ادام قۇقىقتارىن قورعاۋ جۇيەسى نىعايا ءتۇستى. زاڭدارعا قازىلاردىڭ تاۋەلسىزدىگىن كۇشەيتەتىن تۇزەتۋلەر ەنگىءزىلءدى. القا بيلەردىڭ قاراۋىنا جاتاتىن ىستەردىڭ اياسى كەڭەيدى. ادام قۇقىقتارى جونىندەگى ۋاكىل ينستيتۋتى تولىق جۇمىس ىستەپ تۇر. وعان كونستيتۋسيالىق مارتەبە بەرىلدى. مەن بىلتىر جەلتوقسان ايىندا ادام قۇقىقتارىنا قاتىستى ەكىنشى جارلىققا قول قويدىم. مۇنىڭ ءبارى وسى سالادا دايەكتى ءارى تۇبەگەيلى وزگەرىس جاسالىپ جاتقانىن كورسەتەدى"، دەدى پرەزيدەنت.
توقايەۆتىڭ ايتۋىنشا، زاڭ مەن ءتارتىپتى ساقتاۋ ماسەلەسىنە ازاماتتاردىڭ يدەولوگيالىق ۇستانىمى مەن ساياسي كوزقاراسىنىڭ قاتىسى جوق.
"كەيبىرەۋلەر پروكۋراتۋرا ورگاندارىنىڭ ەسكەرتۋىنە قاراماستان، ادام ءتۇسىنىپ بولمايتىن كەسىرلىك كورسەتىپ، زاڭ بۇزادى. ونداي ادامدار ءوزىن زاڭنان جوعارى قويىپ، «اتىڭ شىقپاسا، جەر ورتە» دەگەن ۇستانىممەن ەلگە تانىمال بولعىسى كەلەتىن سياقتى.
كوپتەگەن تاۋەلسىز بۇقارالىق اقپارات قۇرالى جۇمىس ىستەپ تۇرعان، ساياسي سەنزۋرا اتىمەن جوق ەلدە ساياسي قۋدالاۋ بار دەۋ قانشالىقتى ورىندى؟
ول از دەسەڭىز، جاڭا زاڭ قابىلدانىپ، بەيبىت جينالىس وتكىزۋ ءۇشىن رۇقسات الۋدىڭ ورنىنا حابارلاۋ ءتارتىبى ەنگىزىلگەن سوڭ، قازاقستانداعى بەيبىت جيىنداردىڭ سانى ەسەلەپ ارتتى.
مەن تۇيتكىلدەردىڭ ءتۇيىنىن ايقاي-شۋمەن الاڭدا ەمەس، ديالوگ ءۇشىن ارنايى قۇرىلعان ورىنداردا، ەڭ الدىمەن، پارلامەنتتە وركەنيەتتى جولمەن، ساليقالى تۇردە تارقاتۋ كەرەك دەپ ۇنەمى ايتامىن"، دەپ ايتتى توقايەۆ.
پىكىر قالدىرۋ