جازۋشى مۇحتار ماعاۋين "حالىق ءۇنى" پورتالىنىڭ ءجۋرناليسى ايا ءومىرتايعا بەرگەن سۇحباتىندا قازاقستاننىڭ ەكس-پرەزيدەنتى نۇرسۇلتان نازاربايەۆ تۋرالى پىكىر ءبىلدىردى. 

"نازاربايەۆ جونىندە مەن ورنىندا وتىرعان كەزدە ايتقانمىن. 1995 جىلدان باستاپ تالاي رەت ايتىلدى. ايتقاندارىم جازىلدى، باسىلدى. 1995 جىلى اكادەمياداعى كەزدەسۋدە قاتتى ايتتىم. سول كەزدە العاش رەت ساعادييەۆ سايلانعان كەزدە "اكادەميانى جاپتىرادى"، دەپ ايتقانمىن. بۇل – ەشقانداي كورىپكەلدىك ەمەس. مەن ءوز قۇرداسىمدى جاقسى تانيمىن. سول كەزدە "قاسقىر قويدى جەك كورگەننەن جەمەيدى. تاۋداعى رەزيدەنسيالارىڭىز وتە جاقسى ەكەن.  سونى الۋ ءۇشىن اكادەميانى تاراتادى"، دەدىم. بۇل سوزدەرىمنىڭ ءبارى جوعارىعا جەتىپتى. كەيىن تاراتتى عوي. ال نازاربايەۆ تۋرالى بۇعان دەيىن "ۇلتسىزدانۋ ۇرانىندا" ايتتىم. الەمدە نەشەتۇرلى پاتشا بولدى. دانىشپان پاتشالار بولدى. قولباسشى پاتشالار بولدى. ساياساتكەر پاتشالار بولدى. اقىماق پاتشالار بولدى. پسيحولوگيالىق جاعىنان اۋىراتىن پاتشالار بولدى. ءبىراق حالقىن، ەلىن جەرىمەن قوسا ساتىپ جىبەرگەن پاتشا بىزگە عانا بۇيىردى"، دەيدى مۇحتار ماعاۋين سۇحباتىندا. 

بۇدان بولەك جازۋشى زامانىندا كەي زيالى قاۋىم وكىلدەرى نازاربايەۆتى ماقتاپ ەسىرتىپ جىبەرگەنىن ايتتى. 

"باسىندا ءۇمىت ەتتىك، ارينە. كەزدەيسوق كەلگەن ادام ەدى. الايدا ول – وتارلىق ۇكىمەتتىڭ ودان ءارى وتارلاي بەرۋ ءۇشىن قويعان ادامى. اۋەلبەكوۆ بولدى، باسقالارى بولدى. الايدا گارباچيەۆ دەگەن وتە زۇلىم ادام عوي. بىردە جازعانىم بار، سوقىر نيكولايدان وتكەن ميسىز ميحايل. ول قازاقتى جانشىپ تاستاۋ ءۇشىن جەلتوقساندى ۇيىمداستىردى. اۋەل باستان قازاققا قارسى جۇمىس جاسادى. قازىرگى جەمقورلىق جەۋ دەگەن ول ءبىر عانا نارسە. نازاربايەۆ قازاقتى توزدىردى، ازدىردى. گولوششەكين  كەزىندە قازاقتىڭ ۇشتەن ەكىسىن قىرىپ تاستاسا، نازاربايەۆ بۇكىل قازاقتىڭ جان دۇنيەسىن جوق قىلدى. بۇزىلدى. حالىق بۇزىلدى. بۇل جونىندە كەيىنىرەك ارنايىلاپ جازاتىن شىعارمىن.  نازاربايەۆ وتارلىق زاماننىڭ جالعاسى، سول بۇرىنعى وتارلاۋ ۇكىمەتىنىڭ رەزيدەنتى. ارينە، بەلگىلى ءبىر مولشەردە قازاقتىڭ، ءوزىمىزدىڭ دە كىنامىز بولدى. زيالى قاۋىم نازاربايەۆتى نۇح پايعامبارعا دا، مۇسا پايعامبارعا تەڭەدى. ونىڭ ءبارى ساقتالىپ تۇرعان شىعار. سوندىقتان بەلگىلى مولشەردە ەسىرتىپ جىبەرگەن ءوزىمىز"، دەيدى جازۋشى.