پرەزيدەنت قاسىم-جومارت توقايەۆتىڭ توراعالىعىمەن الماتى قالاسىندا سەيسميكالىق قاۋىپسىزدىكتى قامتاماسىز ەتۋ ماسەلەلەرى جونىندە كەڭەس ءوتتى، دەپ حابارلايدى اقوردا. قاسىم-جومارت توقايەۆ جيىندا الماتىداعى ءزىلزالاعا قاتىستى پىكىر ءبىلدىردى.
جيىنعا پرەزيدەنت اكىمشىلىگى مەن قاۋىپسىزدىك كەڭەسىنىڭ باسشىلىعى، ۇكىمەت مۇشەلەرى، قالالار مەن وبلىستاردىڭ اكىمدەرى، سونداي-اق ايماقتارداعى توتەنشە جاعدايلار دەپارتامەنتتەرىنىڭ جەتەكشىلەرى قاتىسقان. توقايەۆ ەل اۋماعىنىڭ ۇشتەن ءبىر بولىگىندە جەر سىلكىنىسى ءقاۋپى بار ەكەنىن ايتقان.
– دابىل قوسىلمادى. بۇل دۇرىس شەشىم بولدى. ايتپەسە، قالادا دۇربەلەڭ تۋىندايتىن ەدى. ءبىراق حالىقتى باسقا بايلانىس ارنالارى ارقىلى حاباردار ەتۋ قاجەت بولاتىن. قۇلاقتاندىرۋ بىرنەشە نەگىزگى مىندەتتى شەشۋى كەرەك. ولاردىڭ قايسىسىن بۇرىن قولدانۋ كەرەكتىگى قاۋىپ-قاتەردىڭ اۋقىمىنا بايلانىستى. الايدا قولدانىستاعى الگوريتمدەردە بۇل ەسكەرىلمەيدى. قاتتى جەر سىلكىنىسى كەزىندە ادامداردى ءزىلزالانىڭ فيزيكالىق سيپاتتامالارى مەن ەپيسەنترى تۋرالى اقپارات قىزىقتىرمايدى. ولار تابيعات اپاتىنىڭ قانشالىقتى جويقىن ەكەنىن ونسىز دا سەزىندى. مۇنداي ساتتە، ەڭ باستىسى، تۇرعىنداردى ءارى قاراي قالاي ارەكەت ەتۋ جونىندەگى اقپاراتپەن قامتاماسىز ەتۋ ماڭىزدى. ازاماتتار «ۇيگە ورالۋعا بولا ما؟»، «قايدان كومەك الۋعا بولادى؟» دەگەن ساۋالدارعا جاۋاپ الۋى كەرەك. سوندىقتان قۇلاقتاندىرۋ جۇيەسىن قايتا قاراپ، ونى بارىنشا ناقتى قاجەتتىلىككە بەيىمدەۋ قاجەت. تەحنيكالىق قۇرالدار اقپاراتتىڭ ءار ادامعا ۋاقىتىلى جەتۋىن قامتاماسىز ەتۋگە ءتيىس. بۇل جولى SMS-حابارلامالار تىم كەش كەلدى. سونداي-اق ءدۇمپۋ كەزىندە بايبالام سالىپ، جالعان اقپارات تاراتقاندار بولدى. جۇرتتى ادەيى دۇرلىكتىرگەن ادامداردى زاڭعا سايكەس جازاعا تارتۋ قاجەت، – دەدى پرەزيدەنت.
ەسكە سالساق، الماتىدا 23 قاڭتار كۇنى تۇندە قۋاتتى جەر سىلكىنىسى بولدى. قالالىق دەنساۋلىق ساقتاۋ باسقارماسى 40-تان استام ادام جاراقات العانى جونىندە اقپارات تاراتتى.
پىكىر قالدىرۋ